ޑައިޓުގައި އުޅުނަސް ބަތް ކެއުން ހުއްޓައިނުލާތި!
ބަރުދަން ލުއިކުރަން މަސައްކަތް ކުރާއިރު ގިނަ މީހުން އެންމެ ފުރަތަމަ ވެސް ކުރާ ކަމަކީ ބޮޑެތި ކެއުންތަކާ ދުރުވުމެވެ. އެގޮތުން ގިނަ މީހުން ބަތް ކެއުން ހުއްޓައިލައެވެ. އެހެން ނަމަވެސް ޑައިޓުގައި އުޅޭއިރު ބަތް ކެއުން މުޅިން ހުއްޓައިލުން ބުއްދިވެރި ނޫންކަމަށް ނިއުޓްރިޝަނިސްޓުން ދެކެއެވެ.
ނިއުޓްރިޝަނިސްޓު ރުޖުތާ ދިވޭކަރް ބުނާ ގޮތުގައި ބަތަކީ ސިއްހީ އެތައް ފައިދާތަކެއް ލިއްބައިދޭ ކެއުމުގެ ބާވަތެކެވެ. އޭނާ ވަނީ އެފަދަ އެތައް ފައިދާތަކެއް ފާހަގަކޮށްފައެވެ.
ބަތަކީ މީހާގެ ލޭގެ ޕްރެޝަރު އެއްވަރެއްގައި ހިފަހައްޓައިދޭނެ ބާވަތެކެވެ. ފަސޭހައިން ހަޖަމު ކުރުމަށް ފަސޭހަ، ކެއުމުގެ މި ބާވަތަކީ ހަކުރު ލެވެލް އެއްވަރެއްގައި ހިފެހެއްޓުމަށް ވެސް ރަނގަޅު އެއްޗެކެވެ.
އަނެއްކޮޅުން ބަނޑަށް ލުއިވުމުގެ ސަބަބުން ބަތް ކެއުމުން އަރާމު ނިދި ލިބުމަށާއި ހޯމޯން ބެލެންސް ކުރުމަށް ވެސް ބަތަކީ އެހީތެރިއެކެވެ. މީގެ އިތުރުން ހަންގަނޑަށް ވެސް ބަތަކީ ރަނގަޅު ބާވަތެކެވެ. އެއީ ބަތުގައި ގިނަ އަދަދަކަށް ޕްރޮލެކްޓިން ހިމެނޭތީއެވެ. މީގެ އިތުރުން އިސްތަށިގަނޑު ހެދި ބޮޑުވުމަށް ވެސް ބަތް އެހީވެދެއެވެ.
ދެން ވިސްނާލަން ޖެހޭ އަނެއް ކަމަކީ ބަތް ކެއި ނަމަވެސް ޑައިޓުގައި އުޅޭ ނަމަ ކޮންމެވެސް ވަރެއްގެ މިންގަނޑެއް ގެންގުޅުމަށެވެ. އެގޮތުން އާންމުކޮށް ވެސް ޑައިޓުގައި އުޅޭ މީހުން ކަން ކުރާ ގޮތަށް ކިރައިގެން ބަތް ކެވިދާނެއެވެ. ނުވަތަ މިން ކުރުމަށް ވަކި ތައްޓެއް ނުވަތަ ޖޯޑެއް ވެސް ގެންގުޅެވިދާނެއެވެ.
ބަތް ކާނީ ދުވާލަކު ކިތައް ފަހަރު ހެއްޔެވެ؟ މެންދުރާއި ރޭގަނޑު މިދެންނެވިހެން މިންކޮށްގެން ބަތް ކެއުމަކުން މައްސަލައެއް ނެތެވެ. ނުވަތަ ހަމައެކަނި މެންދުރު ބަތް ކެއުން ވެސް ރަނގަޅެވެ. ރޭގަނޑު ބަތް ކާނަމަ އެންމެ ލަސްވެގެން 9 ޖެހުމުގެ ކުރިން ކާން އާދަކުރަން ވާނެއެވެ. އަނެއްކޮޅުން ކެއުމަށް ފަހު ނިދުމާއި ދޭތެރޭގައި ގާތްގަނޑަކަށް ދެ ގަޑިއިރުގެ ވަގުތެއް ދޭންވާނެއެވެ.
Ads by STO
