މަޑުއްވަރީ ސުކޫލުގައި ޕްރިންސިޕަލެއް ނެތި 6 މަސް، މިނިސްޓަރު މަޖިލީހަށް!
ރ. މަޑުއްވަރީ ސުކޫލުގައި ޕްރިންސިޕަލަކު ނެތި 6 މަސްވެފައި ވާތީ، އެކަމާ ބެހޭ ގޮތުން ސުވާލުކުރުމަށް އެޑިއުކޭޝަން މިނިސްޓަރ އައިޝަތު އަލީ ރައްޔިތުންގެ މަޖިލީހަށް ހާޒިރު ކުރުމަށް، މަޑުއްވަރީ ދާއިރާގެ މެމްބަރު އާދަމް ޝަރީފު އުމަރު އެދިވަޑައިގަންނަވައިފިއެވެ.
މިނިސްޓަރ މަޖިލީހަށް ހާޒިރުކޮށް މަޑުއްވަރީ ސްކޫލަށް ޕްރިންސިޕަލަކު ލިބޭނީ ކޮން ތާރީޚެއްގައިތޯއާއި ޕްރިންސިޕަލަކު ނުލިބިގެން އުޅެނީ ކީއްވެތޯ އަދި ޕްރިންސިޕަލުން ނުލިބޭ، ޕްރިންސިޕަލުން ހަރުލުން ދަތި ރަށްރަށާ މެދު ރާއްވަވާ ގޮތްތަކަކީ ކޮބައިތޯ އެއްސެވުމަށް މެމްބަރު އާދަމް ޝަރީފް ވަނީ ހުށައަޅުއްވައިފައެވެ.
މި ނޯޓިސް ޓްވިޓާގައި ހިއްސާ ކުރައްވައި އާދަމް ޝަރީފް ވިދާޅުވީ 2021ވަނަ އަހަރުގެ މެއި މަހުން ފެށިގެން ރ. މަޑުއްވަރީގައި ޕްރިންސިޕަލަކު ނެތް ކަމަށެވެ.
"2021ވަނަ އަހަރުގެ މެއިއިން ފެށިގެން ރ. މަޑުއްވަރީގައި ޕްރިންސިޕަލެއް ނެތް. އެއީ ވަރަށް ކަންބޮޑުވާކަމެއް. ބައެއް ރަށްރަށަށް ހާޑްޝިޕް ހާއްސަ އިނާއަތެއް ހަމަޖައްސައިގެން ނަމަވެސް ރަނގަޅު ޕްރިންސިޕަލުން ތިބޭނެ ގޮތެއް ކޮންމެހެން ވެސް ހަދައިދޭން ޖެހޭ. އަދި ބައެއް ރަށްރަށުގައި ޕްރިންސިޕަލް ހަރުނުލާ މައްސަލަ ބަލަން ޖެހޭ" އާދަމް ޝަރީފް ވިދާޅުވިއެވެ.
މިއަހަރުގެ ދިރާސީ އައު އަހަރު ފެށުނު އިރު ސުކޫލުތަކަށް ބޭނުންވާ ބައެއް ޓީޗަރުން ނުލިބުމުގެ މައްސަލަތަކާއި ބައެއް ޓެކްސްޓް ފޮތްތައް ނުލިބުމުގެ މައްސަލަތައް ވެސް ވަނީ ފެންމަތިވެފައެވެ. މީގެ އިތުރުން ބައެއް ފޮތްތައް ލިބުނު އިރު ބޮޑެތި މައްސަލަތަކެއް ހުރިކަން ފާހަގަވެ މިނިސްޓްރީއަށް ވަނީ ބޮޑެތި ފާޑު ކިޔުންތަކެއް އަމާޒުވެފައެވެ.
