15 މިލިއަން ރުފިޔާއަށްވުރެ ބޮޑު ނޫން މަޝްރޫޢުތައް ހިންގުން ސިޓީ ކައުންސިލަށް
15 މިލިއަން ރުފިޔާއަށްވުރެ ބޮޑު ނޫން މަޝްރޫޢުތައް ހިންގުން ސިޓީ ކައުންސިލްތަކަށް ދިނުމަށް ފިނޭންސް މިނިސްޓްރީން ނިންމައިފިއެވެ.
ފިނޭންސް މިނިސްޓްރީން މިގޮތަށް ނިންމާފައިވަނީ ގައުމީ އިދާރާތަކުން ރަށެއްގައި ނުވަތަ އަތޮޅެއްގައި ނުވަތަ ސިޓީއެއްގައި ހިންގުމަށް ކަނޑައަޅާ ޕީ.އެސް.އައި.ޕީ މަޝްރޫޢެއް ކައުންސިލް މެދުވެރިކޮށް ހިންގުމުގައި އަމަލުކުރާނެ ގޮތުގެ އުސޫލުގައެވެ.
އެ އުސޫލުގައިވާ ގޮތުން ރަށެއްގައި ނުވަތަ އަތޮޅެއްގައި ޤައުމީ އިދާރާތަކުން ހިންގާ ޕީ.އެސް.އައި.ޕީ މަޝްރޫއު ޤައުމީ އިދާރާތަކުން ރަށެއްގައި ނުވަތަ އަތޮޅެއްގައި ހިންގުމަށް ކަނޑަޅާ ޕީ.އެސް.އައި.ޕީ މަޝްރޫޢުގެ ތެރެއިން، އެ މަޝްރޫއެއްގެ އަގު 5 މިލިއަން ރުފިޔާއަށްވުރެ ދަށުގެ މަޝްރޫޢުތައް ހިންގަންވާނީ، އެ ރަށެއްގެ ނުވަތަ އަތޮޅެއްގެ ކައުންސިލާ ޙަވާލުކޮށްގެންނެވެ.
އަދި އެއް އަތޮޅެއްގެ އެއްރަށަށްވުރެ ގިނަ ރަށްރަށުގައި ހިންގާނެ މަޝްރޫއެއް ހިންގަންވާނީ އެ އަތޮޅެއްގެ އަތޮޅު ކައުންސިލާ ހަވާލުކޮށްގެންކަމަށް އެ އުސޫލުގައި ބުނެފައިވެއެވެ.
މީގެއިތުރުން ޤައުމީ އިދާރާތަކުން ސިޓީއެއްގައި ހިންގުމަށް ކަނޑަޅާ ޕީ.އެސް.އައި.ޕީ މަޝްރޫއުތަކުގެ ތެރެއިން އަގުގެ ގޮތުން 15 މިލިއަން ރުފިޔާއަށްވުރެ ބޮޑު ނޫން މަޝްރޫއުތައް ހިންގަންވާނީ އެ ސިޓީއެއްގެ ކައުންސިލާ ހަވާލުކޮށްގެންކަމަށް ވެސް އެ އުސޫލުގައި ބުނެފައިވެއެވެ.
