މަޝްހޫރު ލަވަކިޔުންތެރިޔާ ހޮޅުދޫ ޢަބްދުﷲ އަވަހާރަވެއްޖެ
މަޝްހޫރު ލަވަ ކިޔުންތެރިޔާ ހޮޅުދޫ އަބްދުﷲ ހަސަން މިއަދު އަވަހާރަވެއްޖެއެވެ.
ހޮޅުދޫ އަބްދުﷲ އަވަހާރަވީ ގިނަ ދުވަސްތަކެއް ވަންދެން އާލާސްކަންފުޅާ އުޅުއްވުމަށް ފަހު މިއަދު އައިޖީއެމްއެޗުގައި ފަރުވާ ހޯއްދަވަމުން ދަނިކޮށެވެ.
ހޮޅުދޫ ޢަބްދުﷲއަކީ، ލަވަ ކިޔުއްވުމުގެ ރޮނގުން ރާއްޖޭގައި ނަން މަޝްހޫރު ބޭފުޅެކެވެ. ތަފާތު ލަވަތައް ކިޔުއްވައި އާންމުންގެ ކުރިމަތީގައި މަޤްބޫލު ލަވަކިޔުންތެރިއެއްގެ މަޤާމު ހޯއްދަވައިފައިވެއެވެ. އޭނާ ކިޔުއްވައިފައިވާ ޤައުމީ ލަވަތަކުގެތެރޭގައި އޯވަޒަން، ވަޠަން އެދޭގޮތަށް، ޖޯޝޭ ގެނައިމީ ޤައުމީ އުފާ، ފަދަ ލަވަތައް ހިމެނެއެވެ.
އޭނާ ވަނީ މަދަޙައާއި މަވްލޫދު ޅެމާއި، ޤައުމީ އެކިއެކި މުނާސަބަތުތަކަށް ހަދައިފައިވާ ލަވަތައް ވެސް ކިޔުއްވައިފައެވެ. ހޮޅުދޫ ޢަބްދުﷲ ރާއްޖެއަށް މަޝްހޫރުވެފައި ވަނީ "ގައުމީ ގުރާ"ގެ ގޮތުގައެވެ.
ހޮޅުދޫ ޢަބްދުﷲ ވަނީ ދިވެހި ލަވަކިޔުމުގެ ރޮނގުން 1981ވަނަ އަހަރު ޢާއްމު ހިދުމަތުގެ ހިތްވަރު ދިނުމުގެ އިނާމުވެސް ހާސިލްކުރައްވައިފައެވެ.
މާތް ﷲ އެމައްޔިތާގެ ފުރާނައަށް ހެޔޮ ރަޙްމަތް ލައްވަވައި ފާފަ ފުއްސަވައި ސުވަރުގޭގެ މަތިވެރި ނިޢުމަތް މިންވަރު ކޮށްދެއްވާށިއެވެ. އާމީން! އަދި މިހިތްދަތި ވަގުތުގައި ޢާއިލާއަށް ކެތްތެރިކަން ދެއްވާށިއެވެ. އާމީން!
إِنَّا لِلّهِ وَإِنَّـا إِلَيْهِ رَاجِعُون
އިންނާ ލިއްލާހި ވަ އިންނާ އިލައިހި ރާޖިޢޫން.މ
އިންނާލިއްލާހި ވައިންނާ އިލައިހި ރާޖިޢޫން