ބޮޑުތިލަދުންމައްޗަށް ކުރެއްވި ދަތުރުުފުޅަށް ފަހު ނައިބު ރައީސް މާލެ ވަޑައިގެންފި
ރައީސުލްޖުމްހޫރިއްޔާގެ ނައިބު ފައިޞަލް ނަސީމް، ހއ އަދި ހދގެ ބައެއް ރަށްރަށަށް ކުރެއްވި ދެ ދުވަހުގެ ދަތުރުފުޅު ނިންމަވައިލައްވައި މާލެ ވަޑައިގެންފިއެވެ.
ރައީސުލްޖުމްހޫރިއްޔާގެ ނައިބު މި ދަތުރުފުޅުގައި ފުރަތަމަ ވަޑައިގެންނެވީ ހއ. ހޯރަފުށްޓަށެވެ.
ހޯރަފުށްޓަށް ވަޑައިގެން އެމަނިކުފާނު ވަނީ ހޯރަފުށީ މަގު ހެދުމުގެ މަސައްކަތް ރަސްމީގޮތުން ފަށްޓަވައިދެއްވައިފައެވެ. އޭގެ އިތުރުން އެމަނިކުފާނު ވަނީ ހޯރަފުށީ އެއަރޕޯޓުގެ ފުރަތަމަ އަހަރީ ދުވަސް ފާހަގަކުރުމުގެ ގޮތުން ބޭއްވި ޚާއްޞަ ރަސްމިއްޔާތު ޝަރަފުވެރިކޮށްދެއްވައިފައެވެ.
އެއަށް ފަހު ހދ. ނެއްލައިދުއާއި ވައިކަރަދޫގެ އިތުރުން ކުޅުދުއްފުށި ސިޓީއަށް އެމަނިކުފާނު ވަޑައިގެންނެވިއެވެ. މި ރަށްރަށުގެ ކައުންސިލުތަކާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކާއި އެކި މުއައްސަސާތަކުގެ ވެރިންނާ ބައްދަލުކުރެއްވުމުގެ އިތުރުން އެ ރަށްރަށުގައި ކުރިޔަށްދާ ތަރައްޤީގެ މުހިންމު ބައެއް މަޝްރޫޢުތައް ބައްލަވައިލައްވައި މުއައްސަސާތަކަށް އެމަނިކުފާނު ޒިޔާރަތްކުރައްވައިފައި ވެއެވެ.
މިދަތުރުފުޅުގެ އެންމެ ފަހު މަންޒިލުކަމުގައިވާ ކުޅުދުއްފުށި ސިޓީއަށް ވަޑައިގެން، ކުޅުދުއްފުށީ ރީޖަނަލް ހޮސްޕިޓަލުގައި ، ދަރިމައިވުމުގެ ޞިއްޙަތާއި ގުޅޭ މަރުކަޒު " އުފަންވެނި ޞިއްޙަތު" އެ މަނިކުފާނު އިފްތިތާޙްކޮށްދެއްވައިފައިވެއެވެ.
ރައީސުލްޖުމްހޫރިއްޔާގެ ނައިބުގެ މި ދަތުރުފުޅުގައި އެމަނިކުފާނުގެ އަރިހުގައި ސަރުކާރުގެ އިސްބޭފުޅުންގެ މައްޗަށް އެކުލެވޭ ވަފްދެއް ބައިވެރިވެވަޑައިގެންނެވިއެވެ.
Ads by STO
