ސާފްތާހިރުކަން ކުޑަވެގެން "ދޮންގޮއްޔެ" ބްރޭންޑްގެ އުފެއްދުންތައް ބޭނުން ނުކުރަން އަންގައިފި
"ދޮންގޮއްޔެ" ބްރޭންޑުން އުފައްދާ އެއްޗެހި ބޭނުން ނުކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މިއަދު އަންގައިފިއެވެ.
އެމްއެފްޑީއޭއިން ބުނީ މި އޮތޯރިޓީއަށް ހުށަހެޅުނު ޝަކުވާއަކާ ގުޅިގެން 'ދޮންގޮއްޔެ' ބްރޭންޑްގެ ކާބޯތަކެތި އުފައްދާ ތަން އެ އޮތޯރިޓީން އިންސްޕެކްޓް ކޮށްފައިވާ ކަމަށެވެ. އަދި ބެލި ބެލުމުން ތަނުގެ އާއްމު ސާފުތާހިރުކަން ވަރަށް ދަށްކަން ފާހަގަކުރެވިފައިވާ ކަމަށް އެމްއެފްޑީއޭއިން ބުންޏެވެ.
މީގެ އިތުރުން މި ކާބޯތަކެތި ތައްޔާރުކުރާ ތަން އިސްލާޙު ނުކޮށް އެތަނުން އުފައްދާ އަދި ބަންދުކުރާ ތަކެތި ބޭނުންކުރުމަކީ އޭގެ ސަބަބުން އާއްމު ޞިއްޙަތަށް ނޭދެވޭ އަސަރުކުރުވާ އަދި ކާބޯތަކެތީގެ ޒަރީޢާއިން ބައްޔެއް ފެތުރޭފަދަ ނުރައްކާތެރި ޙާލަތެއް މެދުވެރި ވުމުގެ ފުރުޞަތު އޮތްކަމެއް ކަމަށް އެމްއެފްޑީއޭއިން ބުނެއެވެ.
އަދި މިހައިތަނަށް ބާޒާރުގައި ހުރި މި ބްރޭންޑުގެ އުފެއްދުންތައް ވިއްކަން ބެހެއްޓުމާއި ވިއްކުމަކީ މަނާކަމެއް ކަމަށާއި އެތަކެތި ބޭނުން ނުކުރުމަށް ވެސް އެމްއެފްޑީއޭއިން ވަނީ އިލްތިމާސްކޮށްފައެވެ.
