ނުކުޅެދުންތެރިކަން ހުންނަ ކުދިންގެ ވަޒީފާއަކަށް ކޮވިޑު ތެރޭގައި ބަދަލެއް ނާދޭ: ރައީސް
ކޮވިޑް-19ގެ ބަލިމަޑުކަމުގެ ތެރޭގައި ރާއްޖޭގެ ގިނަ ވަޒީފާތަކަކަށް އަސަރުކުރި ނަމަވެސް ނުކުޅެދުންތެރިކަން ހުންނަ އެއްވެސް ކުއްޖެއްގެ ވަޒީފާއަށް ބަދަލު އައިސްފައި ނުވާކަމަށް ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރައީސް މިފަދައިން ވިދާޅުވީ ރިވެލި އެވޯޑް 2021 ދިނުމުގެ ގޮތުން ރޭ ބޭއްވި ރަސްމިއްޔާތުގައި ވާހަކަ ދައްކަވަމުންނެވެ. އެގޮތުން ރައީސް ޞާލިހު ވިދާޅުވީ ކޮވިޑުގެ ސަބަބުން އެކި ދާއިރާތަކުން ލިބުނު ގެއްލުންތައް ވަޒަން ކުރިއިރު، ވަޒީފާގެ ބާޒާރަށް ކުރިމަތިވި ލޮޅުންތައް ވަރަށްބޮޑުކަން ފާހަގަ ކުރެވުނު ކަމަށެވެ. ބައެއް މީހުންގެ ވަޒީފާ ގެއްލިގެންދިޔަ ކަމަށާއި ވަޒީފާގައި ދެމިތިއްބަސް، އާމްދަނީ ވަރަށް ބޮޑަށް ދަށަށްދިޔަ މީހުންވެ ސް މަދު ނޫންކަން ރައީސް ފާހަގަކުރެއްވިއެވެ.
"ނަމަވެސް، ނުކުޅެދުންތެރިކަން ހުންނަ އެއްވެސް މީހެއްގެ ވަޒީފާއަށް އެއްވެސް ބަދަލެއް ނާންނަކަމީ، އަޅުގަނޑުމެން ވަރަށް އުފާކުރާ ކަމެއް. އަދި ކޯވިޑުގެ ދަތިކަމުގެ ތެރޭގައި ވެސް، ނުކުޅެދުންތެރިކަން ހުންނަ 25 މީހަކަށް، ފެނަކައިން އިތުރަށް ވަޒީފާ ދިންކަން، އަޅުގަނޑު މި ފުރުޞަތުގައި ފާހަގަކުރަން." ރައީސް ޞާލިހު ވިދާޅުވިއެވެ.
ރިވެލި އެވޯޑް2021 ހަފްލާގައި ރައީސް ބައިވެރިވެވަޑައިގަންނަވަނީ
މީގެ އިތުރުން ރައީސް ވިދާޅުވީ ދައުލަތުގެ ފަރާތުން ޚިދުމަތް ދިނުމުގައި ނުކުޅެދުންތެރިކަން ހުންނަ މީހުންނަށާއި ކުދިންނަށް ލުއި ފަސޭހަ ގޮތްތައް ހަމަޖައްސައިދިނުމަށް، ސަރުކާރުން މަސައްކަތް ކުރަމުންދާ ކަމަށެވެ. އެފަދަ އެއްކަމެއްގެ ގޮތުން 2019 ވަނަ އަހަރު ފެށި ތެރަޕިއުޓިކް ފަރުވާއަށް ޚަރަދު ހަމަޖައްސައިދިނުމުގެ ޕްރޮގްރާމް ކަމަށާއި އެ ޕްރޮގްރާމްގެ ދަށުން ތެރަޕިއުޓިކް ފަރުވާއަށް ސަލާންޖެހުން މިހާރު ވާނީ ހުއްޓުމަކަށް ގެނެވިފައިކަމަށް ރައީސް ވިދާޅުވިއެވެ.
އެ ގޮތުން ތެރަޕިއުޓިކް ފަރުވާއަށް 2019 ވަނަ އަހަރު 3.1 މިލިއަން ރުފިޔާ، އަދި 2020 ވަނަ އަހަރު 7.2 މިލިއަން ރުފިޔާ ދައުލަތުގެ ބަޖެޓުން ޚަރަދު ކުރެވުނުކަމަށް ރައީސް ވިދާޅުވިއެވެ. މީގެ އިތުރުން މިއަހަރުގެ އޮކްޓޯބަރު މަހުގެ ނިޔަލަށް 18.2 މިލިއަން ރުފިޔާ މިކަމަށް ހަރަދު ކުރެވިފައިވާކަމަށް ވެސް އެމަނިކުފާނު ވިދާޅުވިއެވެ.
"އެނގިވަޑައިގަންނަވާނެ، ކޯވިޑުގެ ދަތިކަމުގެ ތެރޭގައި، ދައުލަތުގެ ޚަރަދުތައް ކުޑަކުރުމަށް، ވަރަށް ގިނަ ފިޔަވަޅުތަކެއް އަޅަން މަޖުބޫރުވި. އެހެން ނަމަވެސް، ނުކުޅެދުންތެރިކަން ހުންނަ މީހުންނަށް، މާލީ އެހީ ދިނުމުގެ ޕްރޮގްރާމަށް، ސަރުކާރުން އެއްވެސް ބަދަލެއް ނުގެންނަން. އެއްވެސް މިންވަރެއް އުނިނުކޮށް، މަހުން މަހަށް އެހީތެރިކަން ފޯރުކޮށްދެވުނު." ރައީސް ޞާލިހު ވިދާޅުވިއެވެ.
ރިވެލި އެވޯޑް2021 ހަފްލާގައި ރައީސް ބައިވެރިވެވަޑައިގަންނަވަނީ
އިތުރަށް ރައީސް ވިދާޅުވީ ސަރުކާރުން މިހާރު މަސައްކަތް ކުރަމުން ގެންދަވަނީ ނުކުޅެދުންތެރިކަން ހުންނަ މީހުންނަށް ބޭނުންވާ އެކި އާލާތްތައް ފަސޭހައިން ލިބޭނެ އިންތިޒާމެއް ހަމަޖެއްސުމަށް ކަމަށެވެ. އެކަމުގައި ދުނިޔޭގެ ޞިއްޙަތު ޖަމުޢިއްޔާގެ ލަފަޔާއި މަޝްވަރާ ވެސް ސަރުކަރުން ހޯއްދަވައިފައިވާ ކަމަށާއި އަދި ސަރުކާރުން ހުއްދަކުރާ އެ ފަދަ އާލާތްތަކުގެ ލިސްޓެއް މިހާރު އެކުލަވައިލައިފައިވާކަމަށް ވެސް އެމަނިކުފާނު ވިދާޅުވިއެވެ.
ރޭގެ ރިވެލި ހަފްލާގައި އެވޯޑު ހާސިލްކުރި ކުދިންނަށް ރައީސް ވަނީ ތައުރީފު ކުރައްވައިފައެވެ. އެގޮތުން ނުކުޅެދުންތެރިކަން ހުންނަ ކުދިންގެ ތެރޭގައި ވެސް ހުނަރުވެރި ކުދިން ތިބިކަން ރައީސް ފާހަގަކުރެއްވިއެވެ. އެހެންކަމުން އެމީހުންނަކީ މުޖުތަމައުއަށް ވަރަށް މުހިންމު ބައެއްކަން އެ މަނިކުފާނު ވިދާޅުވިއެވެ.
