އަތޮޅުތަކުގެ ސްކޫލު ކުދީންނަށް ވެސް އަންނަ އަހަރު ބަހުގެ ޚިދުމަތް ލިބޭނެ
އަންނަ އަހަރުން ފެށިގެން މާލޭ ސަރަހައްދެކޭ އެއްގޮތަށް އަތޮޅުތަކުގެ ސްކޫލް ކުދިންނަށް ބަހުގެ ހިދުމަތް ހިލޭ ލިބޭނެކަމަށް އެމްޓީސީސީން ހާމަކޮށްފިއެވެ.
އެ ކުންފުނިން މިއަދު ނެރުނު ބަޔާނެއްގައި ވިދާޅުވީ، އަތޮޅުތަކުގެ ސްކޫލުގެ ދަރިވަރުންގެ އިތުރުން 65 އަހަރުން މަތީގެ މީހުންނާއި، ހާއްސަ އެހީއަށް ބޭނުންވާ މީހުނަށް ވެސް ބަހުގައި ހިލޭ ދަތުރު ކުރެވޭނެއެވެ.
މީގެ ކުރިން ވެސް މާލޭ ސަރަހައްދުގެ ދަރިވަރުންނަށް ފެރީއާއި ސްކޫލު ބަހުގައި ހިލޭ ދަތުރު ކުރެވެއެވެ. އަދި ފެރީގައި އުމުރުން 65 އަހަރުން މަތީގެ މީހުންނަށާއި، ހާއްސަ އެހީއަށް ބޭނުންވާ މީހުންނަށް ހިލޭ ދަތުރުކުރެވެއެވެ.
މިވަގުތު އެމްޓީސީސީން އަތޮޅުތެރޭގައި ބަހުގެ ހިދުމަތް ދަރިވަރުންނަށް ޚާއްސަކޮށްގެން ކުރިޔަށް ގެންދަނީ އައްޑޫ ސިޓީގެ ހިތަދޫ އަދި ފޭދޫއާ ދެމެދުގައެވެ. އަދި އައްޑޫ، ފުވައްމުލައް އަދި ލ. އަތޮޅުގެ ގަން، ފޮނަދޫ، އަދި އިސްދޫ، ކަލައިދޫ ރަށްތަކުގައި ސްކޫލު ދަރިވަރުންނަށް ބަހުގެ ހިދުމަތް ފެށުމަށް ޓަކައި އައު ބަސްތަކެއް ހޯދުމުގެ މަސައްކަތް ކުރަމުންދާ ކަމަށް ވެސް އެ ކުންފުނިން ވިދާޅުވިއެވެ.
