އިންތިހާބުގެ ތަހުގީގު ރިޕޯޓުގައި އޮތް ތައްގަނޑާ މެދު ސުވާލެއް! ވާހަކަތަކަށް ފުލުހުން ކޮމެންޓެއް ނުކުރި!
2018 ވަނަ އަހަރު ބޭއްވި ރިޔާސީ އިންތިހާބު އޮޅުވައިލިކަމަށް ބުނެ ފުލުހުންނަށް ހުށަހެޅި މައްސަލައާ ގުޅިގެން ހިންގި ތަހުގީގަށް ފަހު ތައްޔާރުކުރި ރިޕޯޓުކަމަށް ބުނާ ލިޔުމެއް އިއްޔެ ސޯޝަލް މީޑިއާގައި ލީކުކޮށްލި ލިޔުމުގައި އޮތް ތައްގަނޑާ މެދު ސުވާލު އުފެދިއްޖެއެވެ.
ފުލުހުންގެ ތަހުގީގު ރިޕޯޓުކަމަށް ބުނެ އިއްޔެ ލީކުކޮށްލި ލިޔުމުގައި ޖުމްލަ 54 ނުކުތާއެއް ފާހަގަކޮށްފައި ވެއެވެ. އިންތިހާބު އޮޅުވައިލިކަމަށް އެ ރިޕޯޓުގައި ބުނެފައި ވެއެވެ.
ލީކުކޮށްލައިފައިވާ ލިޔުމުގައި ޖަހައިފައިވާ ފުލުހުންގެ ސްޓޭމްޕު ތައްގަނޑުގައި އޮތީ "ދިވެހި ފުލުހުންގެ ޚިދުމަތް" ޖަހައިފައެވެ. އެހެން ނަމަވެސް މި ތައްގަނޑު ފުލުހުން ބޭނުންކުރަން ފަށައިފައި ވަނީ ފުލުހުންގެ ނަން "މޯލްޑިވްސް ޕޮލިސް ސާވިސް"އިން "ދިވެހި ފުލުހުންގެ ޚިދުމަތަށް" ބަދަލުކުރި ފަހުންނެވެ. އެއީ މިއަހަރުގެ މެއި މަހުގެ ފަހުންނެވެ. އޭގެ ކުރިން ފުލުހުން ބޭނުންކުރަމުން އައި ސްޓޭމްޕު ތައްގަނޑުގައި ޖަހައިފައި އޮންނަނީ "މޯލްޑިވްސް ޕޮލިސް ސާވިސް"އެވެ.
މިކަމާ ފުލުހުންނާ ސުވާލުކުރުމުން ފުލުހުން ބުނީ ގާނޫނު ފާސްކުރުމުގެ ކުރިން "ދިވެހި ފުލުހުންގެ ޚިދުމަތް" ޖަހައިފައިވާ ސްޓޭމްޕް ތައްގަނޑު ބޭނުން ނުކުރާކަމަަށެވެ. އެހެން ނަމަވެސް ލީކުވި ލިޔުމުގައި ހުރި ވާހަކަތަކާ މެދު ސުވާލު ކުރުމުން ފުލުހުން އެކަމަށް ކޮމެންޓް ކުރައްވައިފައެއް ނުވެއެވެ.
ލީކުވި ލިޔުމުގައި ތާރީހެއްގެ ގޮތުގައި ޖަހައިފައި ވަނީ 06 ނޮވެމްބަރު 2018އެވެ. މިތާރީހުގައި ފުލުހުން ބޭނުންކުރާ ސްޓޭމްޕުގައި އޮންނަނީ "މޯލްޑިވްސް ޕޮލިސް ސާވިސް" ޖަހައިފައެވެ.
އިއްޔެ ލީކުކޮށްލި ފުލުހުންގެ ރިޕޯޓާ އެކު އިލެކްޝަންސް ކޮމިޝަންގެ ރައީސްގެ މަގާމުގައި 2018 ވަނަ އަހަރު ހުންނެވި އަހުމަދު ޝަރީފު (ރަންގޮނޑި) ދެއްވި ބަޔާންކަމަށް ބުނާ ލިޔުމެއް ވެސް ވަނީ ލީކުކޮށްލައިފައެވެ. އަދި އިންތިހާބު ސައްހަ ނޫންކަމަށް ބުނެ ކޯޓުގައި ދައުވާކުރާ ނަމަ އެކަމަށް ފުލުހުންގެ ފަރާތުން އެއްބާރުލުން ދޭނެކަމަށް ބުނާ ލިޔުމެއް ވެސް އިއްޔެ ލީކުކޮށްލިއެވެ.
މިލިޔުމާ ގުޅިގެން އީސީގެ އޭރުގެ ރައީސް އަހުމަދު ޝަރީފު ވަކި އެއްޗެއް ވިދާޅުނުވި ނަމަވެސް އީސީގެ އޭރުގެ ނައިބު ރައީސް އަހުމަދު އަކްރަމް ވަނީ އިންތިހާބުގައި އެއްވެސް އޮޅުވާލުމެއް ނޯންނާނެކަމަށް ވިދާޅުވެފައެވެ. އިންތިހާބު އޮޅުވައިލިކަމުގެ ތުހުމަތު ކުރަމުން ދަނީ އިދިކޮޅު ޕީޕީއެމް ޕީއެންސީންނެވެ. އެކޯލިޝަނުން އެންމެ ފަހުން ބޭއްވި ޖަލްސާގައި ވެސް އެ ވާހަކަތައް ތަކުރާރުކޮށްފައި ވެއެވެ. އެ ވާހަކަތަކަށް ބާރު ލިބޭ އެތައް ކަމެއް އެ ރިޕޯޓްގައި ފާހަގަކޮށްފައި ވެއެވެ.
ރިޕޯޓް އެކުލަވާލާ ނިންމާފައިވާއިރު ފަހުން އޭގެ ޕްރިންޓެއް ނަގާފައި ފަހުގެ ތައްގަނޑު ޖަހާފައިވެސް ނެރެވިދާނެ ތީގައިވިސްނަންވީ ސައްޚަވިޔަސް ނުވިޔަސް މޯލްޑިވްސް ޕޮލިސް ސާރވިސް ވިޔަސް އަދި ދިވެހި ފުލުހުންގެ ޚިދުމަތް ވިޔަސް ބޭނުންކޮށްފައިވަނީ ފުލުހުންގެ ތައްގަނޑުކަން ދިވެހިންނަށް ޔަޤީންވޭ އެހެންކަމަށްވާނަމަ މި ލިޔުމާއި ގުޅިގެން މީގޯސް ލިޔުމެއްކަން ނިންމާނީ ނޫސްވެރިންނެއް ނޫން އެކަން ނިންމާނީ ދިވެހި ފުލުހުން ދެން އޮތީ އިންތިޚާބެއް އޮޅުވާލީއޭ ބުނެ ކުރާ ތުހުމަތު މީ ވަރަށް ބޮޑު ތުހުމަތެއް ކޮންމެ އަކަސް މިކަން އެންމެ ކުޑަ ކުއްޖާއަށްވެސް ފަހުމްވީ އިލެކްޝަނުން ވޯޓު ކަރުދާސް ނައްތާލުމުން
2013 ގައި ވެސް ވޯޓު އޮޅުވާލި ކަމަށް ވެސް ރިޕޯޓު ލިޔެ ނެރެވިދާނެ. ތައްގަނޑު ވެސް ޖެހިދާނެ. ވެރިކަމާހުރެ ދަހިވެތި ވިޔަސް މީ ތަންކޮޅެއް ބޮޑުވަރު.
ޔާމީނު ދޫކޮށްލާފަ ބަހައްޓަންޏާ މިކަހަލަ ކިތައްމެ ސްޓަންޓެން ޖައްސާނެ. ހަމަ ބުއްދި ފިލީމާ ވާނެއެތި މިވަނީ.