މަސްތުވާތަކެތީގެ މައްސަލައެއްގައި ވިލިމާލެއިން ހަތަރު މީހަކު ހައްޔަރުކޮށްފި
މަސްތުވާތަކެއްޗާ ދެކޮޅަށް ފުލުހުން ކުރަމުންދާ މަސައްކަތުގެ ތެރެއިން، މަސްތުވާތަކެތީގެ މައްސަލައެއްގައި ވިލިމާލެއިން ހަތަރު މީހަކު ހައްޔަރުކޮށް އަދި ދިގުރަށުގައި ހިންގި އޮޕަރޭޝަނެއްގައި މަސްތުވާތަކެތި ހޯދައިފިއެވެ.
ފުލުހުން ވިދާޅުވީ އެ މައްސަލައާ ގުޅިގެން ހައްޔަރުކޮށްފައި ވަނީ 19 އަހަރުގެ މީހަކާއި 21 އަހަރުގެ މީހަކާއި 24 އަހަރުގެ މީހެއްގެ އިތުުރުން 27 އަހަރުގެ މީހެއް ކަމަށެވެ. މި ހަތަރު މީހުންނަކީ ވެސް ދިވެހި ފިރިހެނުންނެވެ.
ފުލުހުން ވިދާޅުވީ އެ މީހުން ހައްޔަރުކޮށްފައި ވަނީ މި މަހު 29ވަނަ ދުވަހުގެ ރޭ ވިލިމާލެތެރެ ޕެޓްރޯލް ކުރުމުގެ ތެރެއިން، އެމީހުންގެ އަމަލުތައް ހުރިގޮތުން ހުއްޓުވައި ބަލައި ފާސްކުރިއިރު މަސްތުވާތަކެތި ކަމަށް ބެލެވޭ އެއްޗެއް ހުރި 67 ސެލޯފިންކޮޅު ފެނުމާ ގުޅިގެން ކަމަށެވެ.
މައްސަލައާ ގުޅިގެން އެ މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރުމުން މިނިސްޓްރީ އޮފް ހޯމްއެފެއާޒުން ކަނޑައަޅާ ތަނެއްގައި ބަންދުގައި ބެހެއްޓުމަށް 10 ދުވަހުގެ މުއްދަތު 24 އަހަރުގެ މީހާއަށް ދީފައިވާ ކަމަށާއި އަނެއް ތިން މީހުން ބަންދުގައި ބެއިތިއްބުމަށް ހަތަރު ދުވަހުގެ މުއްދަތު ދީފައިވާކަމަށް ފުލުހުން ވިދާޅުވިއެވެ.
