އަހަރުގެ ފުރަތަމަ ފަތުރުވެރިޔާ: އުފަން ދުވަހަށް ލިބުނީ ބޮޑު ސަޕްރައިޒެއް!
މި ފެށުނު އައު އަހަރުގެ ފުރަތަމަ ފަތުރުވެރިއަކީ އިނގިރޭސިވިލާތުގެ ޖޯޖީނާ ކޭނިންއެވެ.
އެނގިފައިވާ ގޮތުގައި ޖޯޖީނާ ރާއްޖެ އައީ ދެ މުނާސަބަތެއް ފާހަގަ ކުރުމަށެވެ. އެއީ އިއްޔެ އޭނާއަށް 47އަހަރު ފުރުމާއި މި ފެށުނު 2022ވަނަ އަހަރު، ރާއްޖޭގެ ޤުދުރަތީ ރީތިކަމުގައި ފާހަގަ ކުރުމަށެވެ.
މި ދެ މުނާސަބަތު ވެސް ނުހަނު ކުލަގަދަކޮށް ފާހަގަ ކުރުމުގެ ނިޔަތުގައި، ޖޯޖީނާ އޭނާގެ ހަޔާތުގެ ބައިވެރިޔާއާ އެކު ގަލްފްއެއާގެ ބޯޓުން ރާއްޖޭގެ ވެލާނާ އިންޓަނޭޝަނަލް އެއާޕޯޓް (ވީއައިއޭ)އަށް ފޭބުމުން އޭނާއަށް ލިބުނީ ހީވެސް ނުކުރާ ފަދަ ބޮޑު ސަޕްރައިޒެކެވެ. އެއީ، މި އަހަރު ރާއްޖެ ޒިޔާރަތްކުރި ފުރަތަމަ ފަތުރުވެރިޔާއަށް ވުމުގެ ޝަރަފެވެ.
ކޮންމެ އަހަރެއް ވެސް ފެށޭ އިރު، ރާއްޖެއަށް އަންނަ ފުރަތަމަ ފަތުރުވެރިޔާއަށް އެމްއެމްޕީއާރްސީއާއި ޓޫރިޒަމް މިނިސްޓްރީގެ ފަރާތުން ހާއްސަ މަރުހަބާއެއް ކިޔައެވެ.
މިއީ ޖޯޖީނާއާއި އޭނާގެ ހަޔާތުގެ ބައިވެރިޔާ ރާއްޖއަށް ޒިޔާރަތްކުރި ދެވަނަ ފަހަރެވެ. އެ ދެމީހުން ވަނީ މިދިޔަ އަހަރު ވެސް އައު އަހަރާ ދިމާކޮށް ރާއްޖެ އައިސްފައެވެ. މި އަހަރު ވެސް އެ ދެމީހުން ތިބެނީ، މިދިޔަ އަހަރެކޭ އެއްގޮތަށް ސިނަމަން ހަކުރާ ހުރާ ރިސޯޓުގައެވެ. އެމީހުންގެ މި ދަތުރުގައި، ރާއްޖޭގައި 11 ދުވަސް ހޭދަކުރާނެއެވެ.
