ސިޔާސީ ކޮރަޕްޝަންގެ ވާހަކަ ރިޕޯޓުކުރާ ނޫސްވެރިންނަށް ރާއްޖޭގައި ބިރުދައްކާ!

ރާއްޖޭގައި ސިޔާސީ ކޮރަޕްޝަންގެ ވާހަކަ ރިޕޯޓުކުރާ ނޫސްވެރިންނަށް ބިރުދައްކައި އެމީހުންގެ މަސައްކަތަށް ބާރުފޯރުވަން އުޅޭކަން ފާހަގަކުރެވޭކަމަށް، ހިއުމަން ރައިޓްސް ކޮމިޝަން އޮފް ދަ މޯލްޑިވްސް، އެޗްއާރުސީއެމްއިން ނެރުނު 2021ވަނަ އަހަރުގެ ހިއުމަން ރައިޓްސް ރިޕޯޓުގައި ބުނެފިއެވެ.

Ads by Hajj Corporation

އެޗްއާރުސީއެމްގެ ރިޕޯޓުގައި ވަނީ ނިމިދިޔަ އަހަރު ނޫސްވެރިންގެ މިނިވަންކަމަށް ހުރަސްއެޅޭ ފަދަ އަމަލުތައް ހިންގަމުން ދިޔަކަށް ފާހަގަކޮށްފައެވެ. އެގޮތުން އެފަދަ އަމަލުތައް އެންމެ ގިނައިން ފާހަގަކުރެވޭ ގްރޫޕުތަކަކީ ގޭންގުތަކާއި ކުށް ކުރާ ޖަމާއަތްތަކާއި، ސިޔާސީ ޕާޓީތަކާއި، މަޖްލިސް މެންބަރުންނާއި، ދީނީ ލީޑަރުން އަދި ދީނީ ގްރޫޕްތަކާއި، ފުލުހުންނާއި ސަރުކާރުގެ އިސްވެރިންނެވެ.

ވޭތުވެދިޔަ އަހަރު 60 އިންސައްތަ ނޫސްވެރިންނަށް ވަޔަލެންސާއި ކުރިމަތިލާން ޖެހުނީ އޮންލައިންކޮށެވެ. އަދި 38 އިންސައްތަ ނޫސްވެރިންނަށް އޮފްލައިންކޮށް ވަޔަލެންސާއި ކުރިމަތިލާން ޖެހުނެވެ. އޭގެ ތެރޭގައި މާރާމާރީއާއި ގާނޫނާއި ހިލާފަށް ހައްޔަރު ކުރުމާއި، ބިރުދެއްކުމާއި ފުރައްސާރަ ކުރުމުގެ އިތުރުން ހެކް ކުރުން ފަދަ ކަންކަން ވެސް ހިމެނެއެވެ. ހާއްސަކޮށް އަންހެން ނޫސްވެރިންނަށް ވަޔަލެންސާއި ކުރިމަތިލާން ޖެހުނެވެ. އެގޮތުން 29 އިންސައްތަ އަންހެން ނޫސްވެރިންނަށް އޮންލައިންކޮށް އަދި 21 އިންސައްތަ އަންހެން ނޫސްވެރިންނަށް އޮފްލައިންކޮށް ވަޔަލެންސް ކުރިމަތިވިއެވެ.

އަންހެން ނޫސްވެރިންނަށް އަނިޔާކޮށްގެން ޖުމްލަ 8 މައްސަލައެއް މިދިޔަ އަހަރު ހުށަހެޅި ނަމަވެސް ތަހުގީގު ކޮށްފައި ވަނީ އެންމެ މައްސަލައެއްކަމަށް ރިޕޯޓުގައި ވަނީ ބުނެފައެވެ.

އަންހެން ނޫސްވެރިން ފުލުހުންނަށް މައްސަލަ ހުށަހަޅަން ބޭނުން ނުވާ އެންމެން މައިގަނޑު ސަބަބަކީ މައްސަލަ ހުށަހަޅައިގެން އިންސާފު ނުލިބޭތީއާއި ފުލުހުންގެ ފަރާތުން ރައްކާތެރިކަން ލިބޭނެކަމުގެ އިތުބާރު ނޫސްވެރިންނަށް ނެތުމުންކަމަށް ވެސް މި ރިޕޯޓުން ފާހަގަކުރެވެއެވެ.

އެޗްއާރުސީއެމްގެ ރިޕޯޓް

މީގެ އިތުރުން ބާރުގަދަ މަގާމުތަކުގައި ތިބޭ ފިރިހެނުން އަންހެން ނޫސްވެރިންނަށް ޖިންސީ ފުރައްސާރަ ކޮށްފައިވާއިރު އެކަމަށް އަދަބު ނުލިބި ސަލާމަތްވާކަން އެޗްއާރުސީއެމްއިން ވަނީ ފާހަގަކޮށްފައެވެ.

މަސްދަރު ހާމަކުރުމާ ގުޅިގެން ވެސް އެޗްއާރުސީއެމްގެ ރިޕޯޓުގައި ވަނީ ކަންބޮޑުވުންތަކެއް ފާޅުކޮށްފައެވެ. އެގޮތުން ރައްޔިތުންގެ މަޖިލީހުން އެކުލަވައިލައިފައިވާ ހެއްކާ ބެހޭ ބިލު މިހާރު އޮތްގޮތަށް ފާސްވެ ގާނޫނަކަށް ވެއްޖެ ނަމަ ނޫސްވެރިކަމަށް ދެވިފައިވާ މިނިވަންކަމަށް ހުރަސް އެޅޭނެކަން އެ ކޮމިޝަނުން ފާހަގަކުރިއެވެ. އެ ބިލުގެ 136ވަނަ މާއްދާގެ ދަށުން ނޫސްވެރިންގެ މަސްދަރު ހާމަކުރުމަށް ލާޒިމްކުރުމުގެ ބާރު ކޯޓުތަކަށް ދީފައިވާތީ ނޫސްވެރިކަމާއި ހިޔާލު ފާޅުކުރުމުގެ މިނިވަންކަން ރައްކާތެރިކުރުމަށް މަސައްކަތްކުރާ ފަސް ޖަމްއިއްޔާއަކުން އެކަމާ ކަންބޮޑުވުން ފާޅުކޮށް ނޫސް ބަޔާން ވެސް ނެރެފައިވާކަމަށް އެޗްއާރުސީއެމްއިން ބުނެފައި ވެއެވެ.

އެޗްއާރުސީއެމްއިން ވަނީ އިންސާނީ ހައްގުތަކަށް އުނިކަން އަންނަގޮތަށް ނޫސްވެރިން ކޮށްފައިވާ ބައެއް ކަންކަން ވެސް ފާހަގަކޮށްފައެވެ. އެގޮތުން 13 އަހަރުގެ ކުއްޖަކު ރަހީނުކޮށް ފުރާނަ ގެއްލުވައިލައިފައިވާ ހާދިސާއާއި ބެހޭ މައުލޫމާތު މީޑިއާތަކުގައި ޝާއިއުކުރި އިރު އެކުއްޖާގެ ޒާތީ މައުލޫމާތާއި ފޮޓޯ ބޭނުންކޮށްފައި ވާތީ އެކޮމިޝަނުން ކަންބޮޑުވުން ފާޅުކުރިއެވެ. އަދި އެކުއްޖާއާއި ގުޅިގެން ބައެއް މީޑިއާތަކުން ސައްހަ ނޫން މައުލޫމާތު ވެސް ގެނެސްދިންކަން ފާހަގަކުރިއެވެ.

އެޗްއާރުސީއެމްއިން ބުނީ އެހާދިސާއާ ގުޅިގެން މޯލްޑިވްސް މީޑިއާ ކައުންސިލުން އެފަދަ ލިޔުންތަކާއި ފޮޓޯތައް ނެގުމަށް އެންގުމުން ހުރިހާ މީޑިއާއަކުން ވެސް އެކަން އިސްލާހުކޮށްފައިވާ ކަމަށެވެ. އަދި ބައެއް މީޑިއާތައް ޖޫރިމަނާކޮށް ނަސޭހަތް ވެސް ދިންކަމަށް އެޗްއާރުސީއެމްއިން ބުންޏެވެ.