ހިޔާ ފްލެޓު ލޮބީ ސަރަހައްދުގައި މީހުން ތޮއްޖެހޭ މައްސަލަ ހައްލުކުރުމަށް ޖާގަ އިތުރުކުރަނީ
ހިޔާ ފްލެޓްތަކުގެ ލިފްޓް ކައިރީގައި ޖާގައިގެ ދަތިކަން ދިމާވާތީ އެމައްސަލަ ހައްލުކުރުމުގެ ގޮތުން އެސަރަހައްދުގެ ޖާގަ އިތުރުކުރުމުގެ މަސައްކަތް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިން ފަށައިފިއެވެ.
ހުޅުމާލެ ދެވަނަ ފިޔަވަހީގައި ޢިމާރާތްކޮށްފައިވާ 25 ބުރީގެ 16 ޓަވަރުގައި މިހާރު ގިނަ ޢަދަދެއްގެ ބަޔަކު ދިރިއުޅެމުންދާއިރު އެ ޢިމާރާތްތަކުގައި ބޭނުންކުރުމަށް ކޮންމެ ޓަވަރެއްގައި ޤާއިމްކޮށްފައި ވަނީ 4 ލިފްޓެވެ. އަދި ލިފްޓް ހިމެނޭ ލޮބީ ސަރަހައްދަކީ ޖާގައިގެ ގޮތުން ވަރަށް ހަނި ތަނަކަށްވުމުން މީހުން ގިނަވާ ގަޑިތަކުގައި އެތަނުގައި މީހުން ތޮއްޖެހުމުގެ ސަބަބުން އެ ޢިމާރާތުގައި ދިރިއުޅޭ މީހުންނަށް ވަނީ ގިނަ ދަތިތަކަކާ ކުރިމަތިލާންޖެހިފައެވެ.
އެޗްޑީސީން ވިދާޅުވީ ހިޔާ ފްލެޓްތަކުގެ ލިފްޓް ހުންނަ ލޮބީ ސަރަހައްދުގައި ޖާގަ އިތުރުކުރުމުގެ މަސައްކަތް އެ ކުންފުނިން މިހާރު ފަށައިފައިވާ ކަމަށެވެ. އެގޮތުން އެސަރަހައްދުގައި ހުރި ބައެއް ފާރުތައް ތަޅައިލައި ޖާގަ އިތުރުކުރުމުގެ ޢަމަލީ މަސައްކަތް ބައެއް ފްލެޓްތަކުގައި ފަށައިފައިވާކަމަށް ވެސް ވިދާޅުވިއެވެ.
ހިޔާ ފްލެޓްތަކުގައި ދިރިއުޅޭ ރައްޔިތުންނަށް ބޭނުންވާ އަސާސީ ޚިދުމަތްތަކާއި ވަޞީލަތްތައް ޤާއިމުކުރުމުގެ މަސައްކަތް ސަރުކާރާއި އެޗް.ޑީ.ސީން ގުޅިގެން އަންނަނީ ކުރަމުންނެވެ. މީގެ އިތުރުން މި ސަރަހައްދަކީ ރައްކާތެރި އަމާން ސަރަހައްދަކަށް ހެދުމަށް ސަރުކާރުގެ އިދާރާތަކުންދަނީ މަސައްކަތް ކުރަމުންނެވެ.
