ކޯލިޝަންގެ ބައިވެރިން އެމްޑީޕީއަށް ގޮނޑި ހޯދައިދޭން އުޅޭ ސަބަބާ މެދު ވިސްނަން ޖެހޭ: ސައީދު
ށ.ކޮމަންޑޫ ދާއިރާގެ ގޮނޑި ވެރިކަން ކުރާ މައި ޕާޓީ އެމްޑީޕީއަށް ހޯދައިދިނުމަށް ސަރުކާރު ކޯލިޝަންގައި ހިމެނޭ ބައެއް ބައިވެރިން މަސައްކަތް ކުރާ ސަބަބާ މެދު ވިސްނާލުމަށް ރައްޔިތުންގެ މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ގޮވައިލައްވައިފިއެވެ.
ސައީދު މިހެން ވިދާޅުވެފައި ވަނީ ރާއްޖޭގައި ގާއިމުވެތިބި އިންޑިއާގެ އަސްކަރިއްޔާ، މި ގައުމުން ބޭރު ކުރުމަށް ހިންގާ "އިންޑިއާ އައުޓް" ކެމްޕެއިން ހުއްޓުވުމަށް ޓަކައި، އެ ކެމްޕެއިންގެ ބައިވެރިން ޖަލަށް ލެވޭނެ ފަދަ ބިލެއް، މަޖިލީހުގެ ސުޕަރ މެޖޯރިޓީ އޮންނަ އެމްޑީޕީން ޑްރާފްޓް ކޮށްފައިވާ ކަަމަށް ބުނާ ހަބަރެއް ހިއްސާ ކުރައްވައި، ކުރެއްވި ޓްވީޓެއްގައެވެ.
އެމްޑީޕީގެ މަޖިލިސް މެމްބަރުންނާއި ހަވާލާދީ، ބައެއް މީޑިއާތަކުން ރިޕޯޓް ކޮށްފައިވާ ގޮތުގައި، މިފަދަ ބިލެއް ޑްރާފްޓް ކުރީ ދިވެހިރާއްޖޭގެ ޚާރިޖީ ގުޅުންތަކަށް ނޭދެވޭ އަސަރު ފޯރާގޮތަށް ސިޔާސީ ހަރަކާތް ހިންގައިފި ނަމަ އަދަބު ދެވޭނެ ގޮތެއް ހެދުމަށެވެ.
މިކަމާ ގުޅިގެން ސައީދު ކުރެއްވި ޓްވީޓުގައި ވިދާޅުވީ، ވެރިކަން ހޯދައިދިނީ އިންޑިއާއިން ކަމަށް ގަބޫލު ކުރި ބަޔަކު، އެމީހުންގެ ޕަޕެޓުންގެ ގޮތުގައި ގައުމަށް އަނިޔާވެރިވާތަން ބަލަން ދިވެހިން ނުތިބޭނެ ކަމަށެވެ.
އަދި ކޯލިޝަންގެ ބައިވެރިން، އެމްޑީޕީއަށް ކޮމަންޑޫ ދާއިރާގެ ގޮނޑި ހޯދައިދޭން އުޅޭ ސަބަބާ މެދުގައި ވިސްނުމަށް އެދިވަޑައިގެން، ސައީދު ވަނީ ދިވެހި ރައްޔިތުންގެ ކަރަށް ދެން ފައިން ނޭރޭނެ ކަމަށް ވެސް ވިދާޅުވެފައެވެ.
އޭނާ މިހެން ވިދާޅުވި އިރު، 2018ވަނަ އަހަރުގެ ރިޔާސީ އިންތިހާބު އެމްޑީޕީން ކާމިޔާބު ކުރީ، އިންޑިއާގެ ނުފޫޒުގައި ކަމަށް އިދިކޮޅު ފަރާތްތަކުން ތުހުމަތު ކުރެއެވެ. އެމްޑީޕީގެ ރައީސް މުހައްމަދު ނަޝީދު ވެސް ވަނީ، އެޕާޓީއަށް ވެރިކަން ލިބުނީ އިންޑިއާގެ ޑިޕްލޮމެޓުންގެ އެހީގައި ކަމަށް ވިދާޅުވެފައެވެ.
