އައްޑޫ ސިޓީގައި ހަރަކާތްތެރި ވޭދަނަތަކުގެ ޢަދަދު 813އަށް!
އައްޑޫ ސިޓީގައި ހަލުވި ކަމާއެކު ކޮވިޑް-19 ފެތުރެމުން އަންނައިރު، އެ ސިޓީގައި މި ބަލި ޖެހިފައި ތިބި މީހުންގެ އަދަދު 813އަށް އިތުރުވެއްޖެއެވެ.
އައްޑޫ އިމަޖެންސީ އޮޕަރޭޝަން ސެންޓަރު(އީއޯސީ)އިން އެންމެ ފަހުން އާންމު ކުރި ތަފާސްހިސާބުތަކުން ދައްކާ ގޮތުގައި، އިއްޔެ އެކަނި ވެސް އެސިޓީން 118 މީހަކު ވަނީ ކޮވިޑަށް ފައްސި ވެފައެވެ. މިއާއެކު އެ ސިޓީން މި ބަލި ޖެހުނު މީހުންގެ އަދަދު ވަނީ 4،783އަށް އިތުރު ވެފައެވެ.
އަދި މިހައިތަނަށް 3،955 މީހަކު މިބަލިން ފަސޭހަވީއިރު، ބަލިން ފަސޭހަ ނުވެ ތިބި 813 މީހަކު އެބަތިއްބެވެ.
އައްޑޫގައި އަލަށް ފައްސިވި މީހުންގެ ތެރޭގައި ހިމެނެނީ މީދޫއިން ފައްސިވިވި 15 މީހަކާއި، ހުޅުދޫއިން ފައްސިވި 9 މީހަކާއި، ފޭދޫއިން ފައްސިވި 20 މީހަކާއި، މަރަދޫ-ފޭދޫއިން ފައްސިވި 8 މީހަކާއި، މަރަދޫއިން ފައްްސިވި 10 މީހަކާއި، ހިތަދޫން ފައްސިވި 56 މީހުންނެވެ.
އެ ސިޓީގައި މިހައިތަނަށް ޖުމްލަ 44457 ސުންކު ނަގައިފައިވާ އިރު، އަލަށް ނެގީ 371 ސުންކެވެ.
މުޅި ރާއްޖެއަށް ބަލާއިރު ވެސް، އިއްޔެއަކީ ރެކޯޑް އަދަދަކަށް ކޮވިޑް ބައްޔަށް މީހުން ފައްސިވިވި ދުވަހެކެވެ. އެޗްޕީއޭގެ ތަފާސްހިސާބަށް ބަލާއިރު، އިއްޔެ އެކަނި ވެސް 2،838 މީހަކު ވަނީ ކޮވިޑަށް ފައްސިވެފައެވެ.
