އާޒިމާގެ މައްޗަށް ކުރާ ދެ ދައުވާގެ ޝަރީއަތް، އަހަރެއް ފަހުން މާދަމާ ބާއްވަނީ
އެމްއެމްޕީއާރުސީގެ ބޮޑު ހިޔާނާތުގެ މައްސަލައިގައި ރައީސް އޮފީހުގެ ކުރީގެ ލީގަލް އެފެއާޒު މިނިސްޓަރު އާޒިމާ ޝުކޫރަަށް ކުރާ ދެ ދައުވާގެ ޝަރީއަތްތައް، އަހަރަކަށް ވުރެ ގިނަ ދުވަހަށް ފަހު މާދަމާއަށް ކްރިމިނަލް ކޯޓުގައި އަޑުއެހުމެއް ތާވަލުކޮށްފިއެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ހިންގި އެމްއެމްޕީއާރުސީގެ ބޮޑު ހިޔާނާތުގެ އެ މައްސަލައިގައި، އާޒިމާގެ މައްޗަށް ދައުލަތުން އުފުލައިފައި ވަނީ ރަސްމީ އިދާރާއަކަށް ދޮގު މައުލޫމާތު ދިނުމުގެ ދައުވާއާއި މަނީ ލޯންޑަރިންއަށް މަގުފަހިކޮށް ދިނުމުގެ ދައުވާއެވެ. އެ ދައުވާތައް އޭނާގެ މައްޗަށް އުފުލައިފައި ވަނީ 2019ވަނަ އަހަރުގެ ފެބްރުއަރީ މަހުގެ 17ވަނަ ދުވަހުއެވެ.
މި މައްސަލައިގައި އާޒިމާގެ މައްޗަށް ތުހުމަތުކޮށްފައި ވަނީ ރައީސް ޔާމީނަށް ތުހުމަތު ކުރެވޭ މަނީ ލޯންޑްރިންގެ މައްސަލައިގައި އެ ހިޔާނާތް ހިންގުމަށް މަގުފަހިކޮށްދީފައިވާ ކަމަށެވެ.
މި މައްސަލަ ކްރިމިނަލް ކޯޓުގައި އެންމެ ފުރަތަމަ ބެއްލެވީ ގާޒީ އަހުމަދު ހައިލަމެވެ. ނަމަވެސް ހައިލަމް މަގާމުން ވަކިކުރުމުން ފަހުން އެ މައްސަލައާ ހަވާލުވެވަޑައިގެންނެވީ ގާޒީ ހަސަން ސައީދެވެ. ނަމަވެސް ގާޒީ ސައީދު ވެސް އެ މައްސަލައިން ތަނާޒުލްވުމުން މިހާރު އެ މައްސަލަ އެހެން ސެކްޝަނަކަށް ބަދަލުކޮށް މައްސަލައާ ހަވާލުވެވަޑައިގެންފައި ވަނީ ގާޒީ އަލީ އާދަމެވެ.
މި މައްސަލައިގެ އަޑުއެހުމެއް ތާވަލުކޮށްފައި ވަނީ މާދަމާ މެންދުރު 11:00އަށެވެ.
Ads by STO
