މަސްތުވާތަކެތީގެ އަސަރު ކޮންމެ ރަށަކަށް ވެސް ވަނީ ކޮށްފައި: އިމްރާން
މަސްތުވާތަކެތީގެ ނުރައްކާތެރި އަސަރު، ރާއްޖޭގައި މީހުން ދިރިއުޅޭ ކޮންމެ ރަށަކަށް ވެސް ކޮށްފައިވާ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
މިނިސްޓަރު އިމްރާން މިހެން ވިދާޅުވެފައި ވަނީ، ބ.ގޮއިދޫގައި ގާއިމު ކުރި ޕޮލިސް ޕޯސްޓް، ރަސްމީކޮށް ހުޅުވައި ދެއްވައި ދެއްކެވި ވާހަކައިގައެވެ.
މިކަމަށް ޓަކައި އިއްޔެ ބޭއްވި ރަސްމިއްޔާތުގައި މިނިސްޓަރު އިމްރާން ވިދާޅުވީ، ރައްޔިތުންނަށް އަމާންކަމާއި ރައްކާތެރިކަން ކަށަވަރުކޮށްދިނުމަކީ، ފުލުހުން ރައްޔިތުންގެ މަސައްކަތާ ހަވާލުވެ ރައްޔިތުންނަށް ހިދުމަތް ދިނުމުގެ ކަންކަން ފަށައިގަތް ހިނދު، ރައްޔިތުންނަށް އުފާވެރިކަމާއި، ފާގަތިކަމާއި، ހިތްހަމަޖެހުން ގެނެސްދިނުމުގެ މަސައްކަތް ބައްޓަންކުރުމަށް ފާހަގަކުރެވުނު އެންމެ މުހިންމު އެއްކަންތައް ކަމުގައިވާ ރައްޔިތުންގެ އިގްތިސާދީ އިޖުތިމާއީ ފާގަތިކަމާއި ފަހިކަން ގެނެސްދިނުމަށް ޓަކައި ކުރަން ހުރި މަސައްކަތްތަކުގެ ތެރެއިން އެންމެ މުހިންމު އެއް މަސައްކަތް ކަމަށެވެ.
އަދި ރައްޔިތުންނަށް އަމާންކަމާއި ރައްކާތެރިކަން ކަށަވަރުކޮށްދީގެން މެނުވީ ރައްޔިތުންނަށް އިގްތިސާދީ ފުދުންތެރިކަމާއި، އިޖުތިމާއީ ދުޅަހެޔޮކަން ނާންނާނެ ކަމުގައި ވިދާޅުވިއެވެ.
އަދި މުޅި ރާއްޖެއަށް ވިސްނައި ފިކުރު ހިންގައިލާއިރު ރާއްޖޭގެ ރަށްރަށުގެ މީހުންގެ ދިރިއުޅުމާއި ސަގާފަތާއި ވައްޓަފާޅިއަށް ބޮޑެތި ބަދަލުތަކެއް އައިސްފައިވާކަން ފާހަގަކުރައްވައި މީގެ އެތައް ދުވަހެއް ކުރިން ރާއްޖެއަށް ދިމާވެފައިވާ އެންމެ ނުރައްކާތެރި އެއް ވަބާ ކަމުގައިވާ މަސްތުވާތަކެތީގެ އަސަރު މީހުން ދިރިއުޅޭ ކޮންމެ ރަށަކަށް ކޮށްފައިވާކަން ފާހަގަކުރެއްވިއެވެ.
އަދި އެކަމުގެ ފަހަތުގައި ތިބި ނުރައްކާތެރި މީހުން އެ ކުރާ މަސައްކަތަކީ ހުރިހާ މީހުން ވެސް އެކަމަށް ވިސްނައިގެން ފުލުހުންގެ ހިދުމަތް ބައްޓަންކުރަން ޖެހޭ މަސައްކަތެއް ކަމަށާއި، ސަލާމަތާއި ރައްކާތެރިކަން ރައްޔިތުންނަށް ކަށަވަރުކޮށްދެވޭނީ އެގޮތުން ކަމުގައި ވިދާޅުވިއެވެ.
އެގޮތުން، މެދުކެނޑުމެއް ނެތި ކޮންމެ ދުވަހަކު މަސްތުވާތަކެތީގެ ހަރަކާތްތައް ރާއްޖޭގެ ހުރިހައި ކަންކޮޅުތަކެއްގައި ހިނގަމުންދާކަން ފާހަގަކުރެއްވިއެވެ. އަދި އޭގެ ފަހަތުން އަންނަ ބޮޑެތި ކުށްތަކުގެ ނަތީޖާއިން މުޅި މުޖުތަމައު އަބާއްޖަވެރިވެ ނުތަނަވަސްވެ ހިތްހަމަނުޖެހުމުގެ ތެރެއަށް ވެއްޓިގެންދާކަން ފާހަގަކުރެއްވިއެވެ.
އަދި މި ހާލަތު ބަދަލުކުރުމުގައި ރައްޔިތުންނަށް ދޭންޖެހޭ ސަލާމަތާއި ރައްކާތެރިކަން ކަށަވަރުކޮށްދިނުން އެއީ ގާނޫނުން ފުލުހުންނަށް މަތިކޮށްފައިވާ މަސައްކަތެއްކަން ފާހަގަކުރައްވައި، އެ މަސައްކަތް ކުރުމުގައި ފޫހިކަމެއްނެތި ފުލުހުން ދެމިތިބޭނެކަމުގައި ވިދާޅުވިއެވެ.
