ދޫނިތައް މަރައިލި މައްސަލައިގައި ތަފްސީލީ ރިޕޯޓެއް ހުށަހެޅުމަށް ރައީސް އަންގަވައިފި
ރާއްޖެއަށް އެތެރެ ކުރި ދޫނިތަކެއް މަރައިލި ގޮތުގެ ތަފްސީލީ ރިޕޯޓެއް ހުށަހެޅުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ފިޝަރީޒް މިނިސްޓްރީއަށް އަންގަވައިފިއެވެ.
ރައީސް އޮފީހުން ބުނީ، ގަވައިދާ ހިލާފަށް ރާއްޖެ އެތެރެ ކުރި ދޫނިތައް މަރައިލުމުގެ މައްސަލައިގައި ކަންހިނގައިފައިވާ ގޮތުގެ ތަފްސީލީ ރިޕޯޓެއް ހުށަހެޅުމަށް ރައީސް އަންގަވައިފައިވާ ކަމަށެވެ.
މިދިޔަ އަހަރުގެ ފަހުކޮޅު ރާއްޖެ އެތެެރެ ކުރި ގުރާ އާއިލާއަށް ނިސްބަތްވާ 130 ދޫންޏެއް، ފިޝަރީޒް މިނިސްޓްރީން މަރައިލި މައްސަލަ ހޫނުވެ، ގިނަ ބައެއްގެ ފާޑުކިޔުން އެ މިނިސްޓްރީއަށް ވަނީ އަމާޒުވެފައެވެ.
މިކަމުގައި މިނިސްޓްރީން އަމަލު ކުރީ އެޓާނީ ޖެނެރަލްގެ ލަފާގެ މަތިން ކަމަށް ބުނިއިރު، އޭޖީ އޮފީހުން ބުނީ ދޫނިތައް މަރައިނުލައި، އެގެނައި ގައުމަށް އަނބުރާ ފޮނުވާލެވެން ވެސް އޮތް ކަމަށެވެ.
ދޫނިތައް މަރައި، އަތުރައިލައިފައި ހުރި ފޮޓޯއާއި ވީޑިއޯ މީސްމީޑިއާގައި ދައުރުވަމުން އަންނައިރު، ގިނަ ބަޔަކު ދަނީ މިކަން ކުށްވެރިކޮށް، މިކަމުގެ އަޑީގައި ތިބި މީހުންނަށް އަދަބު ދިނުމަށް ގޮވައިލަމުންނެެވެ. އަދި ގަވައިދާ ހިލާފަށް ދޫނި އެތެރެ ކުރި މީހުންނަށް އަދަބު ނުލިބި، އެއްވެސް ކުށެއް ނެތް ދޫނިތަކަކަށް އަދަބު ދިނުމުން، ގިނަ ބަޔަކު ދަނީ ނުރުހުން ފާޅު ކުރަމުންނެވެ.
މިކަމާ ދެކޮޅަށް އަޑު އުފުލުމަށް، ޒުވާނުންތަކެއް އިސްނަގައިގެން ހަވީރު މުޒާހަރާ ކުރުމަށް ވެސް ވަނީ ނިންމައިފައެވެ. އެގޮތުން މި އެއްވުން އޮތީ މިއަދު ހަވީރު އާޓިފިޝަލް ބީޗު ސަރަހައްދުގައެވެ.
