ހަސަން ލަތީފުގެ ޗެއާޕާސަންކަމުގައި ޕާޓީއަށް ހެޔޮ ބަދަލުތަކެއް އައި: އެމްޑީޕީ
އެމްޑީޕީގެ ޗެއާޕާސަންގެ ގޮތުގައި ހަސަން ލަތީފު ހުންނެވި މުއްދަތުގައި ޕާޓީ ވަރުގަދަ ކުރުމަށް ޓަކައި ގިނަ މަސައްކަތްތަކެއްކޮށް ހެޔޮ ބަދަލުތަކެއް ގެނެސްދިންކަމަށް އެ ޕާޓީން ބުނެފިއެވެ.
ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރުކަން ވެސް ކުރައްވާ ހަސަން ލަތީފަކީ އެމްޑީޕީގެ ޗެއާޕާސަންގެ މަގާމުގެ ފަސް އަހަރުގެ ދައުރެއް ފުރިހަމަކުރެއްވި ފުރަތަމަ ބޭފުޅާއެވެ. އެމްޑީޕީ އުފެދުނީއްސުރެ މިއަދާ ހަމައަށް އިތުރު ބޭފުޅަކު ޗެއާޕާސަންގެ ގޮތުގައި ފަސް އަހަރު ފުރިހަމަކޮށްފައެއް ނުވެއެވެ.
މިކަމާ ގުޅިގެން އެމްޑީޕީން ނެރުނު ބަޔާނެއްގައި ބުނީ އެމްޑީޕީގެ އިދާރީ ހިންގުމުގެ އެންމެ އިސް ފަރާތެއްގެ ގޮތުގައި ހުންނަވައި، އެ މުއްދަތުގެ ތެރޭގައި އިދާރީ ހިންގުމަށް ގިނަގުނަ ހެޔޮ ބަދަލުތަކެއް ހަސަން ލަތީފް ގެންނެވި ކަމަށެވެ. އެމްޑީޕީގެ އިސް މުވައްޒަފުންގެ މެދުގައި މަސްލަހަތު ހިފެހެއްޓެވުމަށް އަދާ ކުރެއްވި ޒިންމާއިން ފެށިގެން ޕާޓީގެ އެކިއެކި ގުނަވަންތައް ވަރުގަދަ ކުރެއްވުމާއި، މެމްބާޝިޕް އިތުރު ކުރައްވައި އެންމެ ބޮޑު ސިޔާސީ ޕާޓީގެ ގޮތުގައި ނަގަހައްޓަވައި ދެއްވީ ހަސަން ލަތީފުގެ މަސައްކަތުންކަމަށް ބުނެ އެމްޑީޕީން ވަނީ އޭނާއަށް ޝުކުރު އަދާކޮށްފައެވެ.
މީގެ އިތުރުން ބަޔާނުގައި ބުނީ ހަސަން ލަތީފްގެ ޗެއާޕާސަން ކަމުގެ ދަށުން، ރާއްޖޭގައި ބޭއްވި ހުރިހައި އިންތިޚާބެއްގައި ވާދަކޮށް އެއިން ކޮންމެ އިންތިޚާބެއް އެމްޑީޕީއަށް ކާމިޔާބު ކުރެވިފައިވާކަމަށެވެ.
މިވޭތުވެދިޔަ ފަސް އަހަރުގެ ތެރޭގައި ބޭއްވި ބޮޑެތި ހުރިހައި އިންތިހާބެއް އެމްޑީޕީން ވަނީ ކާމިޔާބުކޮށްފައެވެ. އެންމެ ފަހުން ބޭއްވި ލޯކަލް ކައުންސިލްތަކުގެ އިންތިހާބުގައި މާލެ ސިޓީ ގެއްލި ، އައްޑޫ ސިޓީގެ ސާފު އަޣްލަބިއްތު ވެސް ގެއްލި މުހިންމު ގޮނޑިތަކެއް އެމްޑީޕީއަށް ގެއްލުނު ނަމަވެސް މުޅި ރާއްޖެއަށް ބަލާއިރު އަޣްލަބިއްޔަތު ނެގީ އެ ޕާޓީންނެވެ.
މިދިޔަ ފަސް އަހަރުގެ ތެރޭގައި އެމްޑީޕީއަށް މާޔޫސްކަމާއި ކުރިމަތިލާން ޖެހުނު ހަމައެކަނި އިންތިހާބަކީ ވެސް ލޯކަލް ކައުންސިލްތަކުގެ އިންތިހާބެވެ. އެއީ އެޕާޓީގެ ފުރިހަމަ މެޖޯރިޓީ އޮތް ބައެއް ބޮޑެތި ދާއިރާތަކުގެ އަޣްލަބިއްޔަތު އިދިކޮޅުން ވަނީ ނަގައިފައެވެ.
