ސްޕެޝަލް ކޮންސްޓެބިއުލަރީ ހިދުމަތް ދިނުމަށް ސިޓީ ކައުންސިލުން ފުލުހުންނާ އެކު ސޮއިކޮށްފި
މާލެ ސިޓީގައި ރައްޔިތުންނާ ގުޅުން ހުރި ކަންކަން ހަރުދަނާ ކުރުމަށް ސިޓީ ކައުންސިލުން ކުރަމުން އަންނަ މަސައްކަތުގެ ދަށުން، ސްޕެޝަލް ކޮންސްޓެބިއުލަރީގެ ހިދުމަތް ހޯދައި ލިބިގަތުމަށް ޓަކައި މާލެ ސިޓީ ކައުންސިލުން ދިވެހި ފުލުހުންގެ ހިދުމަތާ އެކު އެއްބަސްވުމެއްގައި ސޮއިކޮށްފިއެވެ.
ސިޓީ ކައުންސިލުން ބުނީ، މި އެއްބަސްވުމުގައި ދެފަރާތުން ސޮއި ކުރީ މިއަދު ކަމަށެވެ.
މި އެއްބަސްވުމާ އެކު، ދިވެހި ފުލުހުންގެ ހިދުމަތާއި މާލެ ސިޓީ ކައުންސިލް ގުޅިގެން މާލެ ސިޓީގެ މުނިސިޕަލް ހިދުމަތްތައް ދިނުމުގެ އުސޫލުތައް ހަރުދަނާ ކުރެވިގެން ދާނެ ކަމަށް ވެސް އެ ކައުންސިލުން ބުނެއެވެ.
މި އެއްބަސްވުމުގެ ދަށުން މާލެ، ވިލިމާލޭގެ މަގުތަކާއި، ޕާކުތަކާއި، މައިދާންތަކުގެ އިތުރުން ޕޭވްމަންޓްމަތީގައި ނުވަތަ އާންމު ތަންތަނުގައި ގަވާއިދާއި ޚިލާފަށް ތަކެތި ބަހައްޓާ ފަރާތްތައް ހޯދައި އެ ފަރާތްތަކާ މެދު ފިޔަވަޅު އެޅުމާއި، އެފަދަ ފަރާތްތަކުގެ މަޢުލޫމާތު ދެނެގަތުމުގައި ކައުންސިލަށް ފަސޭހަވެގެންދާނެ ކަމަށް ސިޓީ ކައުންސިލުން ބުނެއެވެ.
މިއާ އެކު މާލެ ސިޓީގެ މަގުތަކާއި،ހުސްބިންތަކާއި، ޕާކުތައް އަދި މައިދާންތަކާއި، ވިޔަފާރިކުރާ ސަރަހައްދުތަކުގައި ހުއްދަ ނުނަގައި ހިންގާ ކަންކަން ބަލައި، އެފަދަ ކަންކަން ހުއްޓުވުމަށް ޓަކައި އެފަރާތްތަކުގެ މައުލޫމާތު ދިވެހި ފުލުހުންގެ ހިދުމަތުގެ ފަރާތުން ކައުންސިލާއި ހިއްސާކުރާނެއެވެ. އަދި އެފަދަ ފަރާތްތަކާ މެދު އަޅަންޖެހޭ ފިޔަވަޅުތައް ފުލުހުން އަޅާނެއެވެ.
މި އެއްބަސްވުމުގެ ސަބަބުން މާލެ ސިޓީގެ ރައްޔިތުންގެ އެންމެބޮޑު ޝަކުވާކަމަށްވާ ކުނީގެ މައްސަލައަށް ވެސް ބޮޑު ހައްލެއް ލިބިގެންދާނެ ކަމަށް ބެލެވެއެވެ. އެގޮތުން މާލެ ސިޓީގެ މަގުތަކާއި އެނޫން ވެސް ތަންތަނަށް ކުނިއަޅާ ފަރާތްތަކުގެ އަމަލުތައް ހުއްޓުވައި، ކުނިއަޅާ ފަރާތްތައް ދެނެގަނެ އެފަރާތްތައް ޖޫރިމަނާ ކުރުމުގެ ގޮތުން ދޭންޖެހޭ ލިޔުންތައް ދިނުމާ އެކު އެފަރާތްތަކުގެ މައުލޫމާތު ފުލުހުން މާލެ ސިޓީ ކައުންސިލާ ހިއްސާކުރަމުން ދާނެ ކަމަށް ވެސް ސިޓީ ކައުންސިލުން ބުނެއެވެ.
ސްޕެޝަލް ކޮންސްޓެބިއުލަރީގެ ހިދުމަތް ދިނުމަށް ވެފައިވާ އެއްބަސްވުމުގައި މިއަދު ސޮއިކުރެވުނު ނަމަވެސް މި ހިދުމަތް ފެށުމަށް ޓަކައި މިކަމަށް ފުލުހުން ތަމްރީނު ކުރުމަށް ގާތްގަނޑަކަށް ތިންމަސްދުވަސް ހޭދަވާނެ ކަމަށް ފުލުހުން ބުނެފައިވެއެވެ.
އެހެންކަމުން ފުލުހުންގެ ހިދުމަތުން ވާންޖެހޭ ތައްޔާރީތައް ނިނުމުނުހައި އަވަހަކަށް މާލެ ސިޓީގެ ރައްޔިތުންނަށް ސްޕެޝަލް ކޮންސްޓެބިއުލަރީގެ ހިދުމަތް ލިބިގެންދާނެއެވެ.
މާލެ ސިޓީ ކައުންސިލުގެ އެދުމުގެ މަތިން ދިވެހި ފުލުހުންގެ ހިދުމަތުގެ ފަރާތުން ތައްޔާރުކޮށް ހުށަހަޅައިފައިވާ މާލެ ކޮމިއުނިޓީ މޮނިޓަރިންގ ސްޕެޝަލް ކޮންސްޓެބްލަރީ ހިދުމަތުގެ ޕްރޮޕޯސަލްގައި ހިމެނިފައިވާ ބަޖެޓް ފާސްކުރުމަށް އެދި މާލެ ސިޓީކައުންސިލްގެ ހަތަރުވަނަ ދައުރުގެ 32 ވަނަ އާންމު ޖަލްސާގައި ހުށައެޅި ހުށައެޅުމަށް، ޖަލްސާގައި ބައިވެރިވެ ވަޑައިގަތް ކައުންސިލަރުންގެ އިއްތިފާގުން ވަނީ ފާސްކޮށްފައެވެ.
ދިވެހި ފުލުހުންގެ ޚިދުމަތުގެ ފަރާތުން ހޯދާ ސްޕެޝަލް ކޮންސްޓެބްލަރީ ޚިދުމަތަށް ބޭނުންވާ ބަޖެޓް ހަމަޖައްސާނީ މާލެ ސިޓީ ކައުންސިލުންނެވެ.
