ޑީ ޓިއުން ބޭންޑްގެ މަސް ލޯންޗުގައި ހުރި ބޮޑު ދެ އައިސް ފޮށި ވަގަށް ނަގައިފި
ރާއްޖޭގެ މަޝްހޫރު މިޔުޒިކް ބޭންޑެއް ކަމަށްވާ "ޑީ ޓިއުން" ބޭންޑުގެ މަސް ލޯންޗުގައި ހުރި ބޮޑު ދެ އައިސް ފޮށި ވަގަށް ނަގައިފިއެވެ.
މިކަމާ ގުޅިގެން "ދެން" އަށް މައުލޫމާތު ދެމުން، އެ ބޭންޑުގެ އެއް ލީޑް ވޯކަލިސްޓް ކަމަށްވާ ފާތިމަތު ފެޒޫ ބުނީ އައިސް ފޮށިތައް ވަގަށް ނަގައިފައި ވަނީ މީގެ ދެ ދުވަސް ކުރިން ކަމަށް ބެލެވޭ ކަމަށެވެ.
"އަޅުގަނޑުމެން މަހަށް ނުދާތާ މިހާރު ތިން ދުވަސް ވެއްޖެ. އެހެންވީމަ އަޅުގަނޑުމެންނަށް ބޮޑަށް ހީވަނީ މިދިޔަ ދެ ދުވަސް ތެރޭގައިހެން އެ ވަގަށް ނެގީ" ފެޒޫ ބުންޏެވެ.
ފެޒޫ ބުނީ ޑީ ޓިއުންގެ ލޯންޗުން ވައްކަން ކޮށްފައި ވަނީ އެ ލޯންޗު އަތޮޅުވެއްސާ ދިމާލު ފަޅުގައި އަޅައިފައި އޮއްވާ ކަމަށެވެ.
އައިސް ފޮށިތައް ވަގަށް ނަގައިފައިވާ މައްސަލަ މިހާރު ފުލުހުންނަަށް ވެސް ހުށަހަޅާފައިވާ ކަމަށާއި، ފުލުހުން އެ މައްސަލަ ބަލަމުންދާ ކަމަށް ވެސް ފެޒޫ ބުންޏެވެ.
މީގެ އިތުރުން ފެޒޫ ބުނީ މިދިޔަ އަހަރު ރަމަޟާން މަހުގެ ކުރިން މި ފަދައިން ވަރަށް ގިނައިން ވައްކަން ކޮށްފައިވާ ކަމަށާއި ރަމަޟާން މަސް ނިމުނު ފަހުން (ވައްކަން ކުރި މީހުންގެ ތެރެއިން) ދެ މީހަކު ވައްކަން ކުރަން އުޅެނިކޮށް މޫދު ތެރެއިން އަތުލައިގެންފައި ވެސް ވާކަމަށެވެ.
"އެމީހުން ނަގައިގެން ފުލުހުންނާ އައިސް ހަވާލު ކުރި، އެކަމަކު އޭގެ އެއް ހަފްތާފަހުން އެނގުނީ އެމީހުން ދޫކޮށްލާފައިވާކަން، އަދި މަގުމަތީގައި ވެސް އުޅޭކަން. މިކަމަށް ހައްލެއް ނުލިބޭ. ކޮންމެ މަހަކު ވެސް ކޮންމެ ވެސް އެއް މަސް ދޯންޏެއް ނޫނީ މި ހިސާބުގައި މަހަށް ދާން ގެންގުޅޭ ހުރިހާ އެއްޗަކުން ވެސް ވައްކަން ކުރޭ." ފެޒޫ ބުންޏެވެ.
ފެޒޫ ބުނީ ވައްކަމުގެ މައްސަލަތަކަށް ހައްލެއް ގެނައުމަށް އަމިއްލައަށް ސީސީޓީވީ ކެމެރާ ހަރުކުރަން ވެސް މަހަށްދާ "ކޮމިއުނިޓީ" ތެރޭގައި ވާހަކަ ދައްކަމުން ދިޔަ ކަމަށާއި ނަމަވެސް އެކަމަށް ޓަކައި ބޭނުންވާ ހުއްދައަށް ވެސް ވާގޮތެއް ނޭނގޭ ކަމަށެވެ.
"ވަރަށް ބައިވަރު މީހުން ޕްރައިވެޓް ސެކްޓާއިން ވެސް އެދިފައި އޮތީ ތިކޮޅުން ނުކުރެވެންޏާ މިކޮޅުން ވެސް ކޮށްފާނަމޭ. އެކަމަކު އެއްވެސް ކަމެއް ނުވޭ. ވަރަށް ދެރަ. ކޮންމެހެން ޑީ ޓީއުންގެ އެއްޗެހި އެކަނި ވަގަށް ނެގީމަކާއެއް ނޫން. މިކަންކަމަށް ހައްލެއް ނުލިބި އޮތީމައި އަދި އެތައް ބަޔަކަށް މިހެން ގެއްލުންވަމުންދާތީ ދެރައީ" ފެޒޫ ބުންޏެވެ.
ޑީ ޓިއުން ބޭންޑުގެ މަސް ލޯންޗުން ވަގަށް ނެގި އައިސް ފޮށިތަކުގެ ތެރެއިން ފޮށްޓެއްގެ އަގަކީ 6،000 ރުފިޔާ ކަމަށް ވެސް ފެޒޫ ބުންޏެވެ.
ޙައްލު އެބައޮތް މި ގައުމަށް އަންނަ ވެރިންގެ ނާގާބިލުކަމުން ތިކަން ނުވަނީ ހަތް އުޑުމަތިން ބާވާލެތްވި ގާނޫނުގަ ތިކަމަށްވެސް ހައްލު އެބައޮތް ނަމުގަ މުސްލިމް ވެގެން ﷲ ގެ ހުކުމް ފުޅުތަށް ބޮލާލާ ޖެހުމުގެ ނަތީޖާ މިގައުމުން ފެނިގެން މިދަނީ ކާކަށްތޯ ކޮންއެތްޗަކަށްތޯ ރަށްކާތެރި ކަ މެތް އޮތީ މި ގައުމުގަ
ހަމައެކަނި އަތް ބުރި ކުރުމަކީ ވައްކަމުގެ އަސްލު ހައްލެއްނަމަ މިހާރު ސައުދީ އަރަބިއާގައި ވަގުންނެއް ނޫޅޭނެއެވެ. ތަންކޮޅެއް ބޮޑައް މިކަމާމެދު ވިސްނާލުމަށް އެދެމެވެ. ވައްކަން ކުރުން މަދުކުރެވޭނީ އަލުގައންޑުމެން ގައުމުގެ މީހުން ދިރިއުޅޭ ފެންވަރު ރަނގަޅުކޮށްގެންނެވެ. ޝުކުރިއްޔާ.