އިންޑިއާގައި ކަރަންޓީނު ކުރި ދިވެހިން ރާއްޖެ ގެނެސްފި
ކޮރޯނާ ވައިރަހުގެ ސަބަބުން ޗައިނާއިން އިންޑިއާއަށް ގެންދިޔަ ހަތް ދިވެހިން ކަރަންޓީނު ފުރިހަމަ ކުރުމަށްފަހު މިއަދު އެނބުރި ރާއްޖެ އައިސްފިއެވެ.
އެއާ އިންޑިއާގެ ހާއްސަ ފްލައިޓެއްގައި މިމަހުގެ ދެވަނަ އިންޑިއާއަށް ގެންދިޔަ އެ ހަތް ދިވެހިން ކަރަންޓީނު ކޮށްފައިވަނީ އިންޑީ ޓިބެޓަން ބޯޑާ ޕޮލިސް ޗައުޅާ ކޭމްޕުގައެވެ. އެ ސަރަހައްދުގައި އިންޑިއާގެ އަސްކަރިއްޔާއިން ވަނީ ކަރަންޓީން ފެސިލިޓީ ގާއިމްކޮށްފައެވެ.
ކަރަންޓީނުކުރި ހަތް ދިވެހިންގެ ތެރޭގައި ހިމެނެނީ ފަސް އަންހެނުންނާއި ފިރިހެނެއްގެ އިތުރުން ކުޑަކުއްޖަކެކެވެ. މި އެންމެން ވެސް ވަނީ ކަރަންޓީނު ފެސިލިޓީގައި 14 ދުވަސް ހޭދަކޮށްފައެވެ.
އެއާ އިންޑިއާގެ ފްލައިޓެއްގައި އެ ހަތް މީހުން ރާއްޖެ އައުމަށް ދަތުރު ފެށީ މިއަދު ފަތިހު 5:30 ހާއިރު އެވެ. މިއަދު 10:20 ހާއިރު ރާއްޖެ އައި ދިވެހިން އާއްމުންނާ ހަމައަށް ނެރުނީ އެއާޕޯޓުގައިވެސް ތާމަލް ކެމެރާ އިން ޓެސްޓު ކުރުމަށްފަހު އެވެ. ދިވެހިން ރިސީވް ކުރުމަށް ފޮރިން މިނިސްޓްރީގެ އޮފިޝަލުންނާއި އިންޑިއާ ހައި ކޮމިޝަންގެ އޮފިޝަލުންވެސް އެެއަޕޯޓުގައި ހަރަކާތްތެރިވި އެވެ.
