އާޒިމްއާ ވާދަ ކުރައްވައި އަސްލަމް ޕީޖީ ލީޑަރަކަށް ހޮވިވަޑައިގެންފި
އެމްޑީޕީގެ ޕާލިމަންޓްރީ ގްރޫޕް (ޕީޖީ)ގެ ލީޑަރުކަމަށް ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް އިންތިޚާބުކޮށްފިއެވެ.
މިއަދު ކުރިޔަށް ދިޔަ އެމްޑީޕީގެ ޕީޖީގެ މެންބަރުން ހޮވުމުގެ އިންތިޚާބުގައި، ޕީޖީގެ ލީޑަރުކަމަށް އަސްލަމާ ވާދަކުރެއްވީ މިހާރު ވެސް އެ މަގާމު ފުރުއްވަމުން ގެންދަވާ މެދު ހެންވޭރު ދާއިރާގެ މެމްބަރު އަލީ އާޒިމެވެ.
މި އިންތިހާބުގައި އަސްލަމަށް 40 ވޯޓު ލިބުނުއިރު އާޒިމަށް ލިބިފައި ވަނީ 25 ވޯޓެވެ.
ޕީޖީ ލީޑަރުކަމުގެ އިތުރުން، ޑެޕިއުޓީ ޕީޖީ ލީޑަރުކަމާއި އަމީން އާންމު، ޗީވް ވިޕް އަދި ވިޕުން ހިމެނޭހެން މިއަދު ހަ މަޤާމަކަށް ބޭފުޅުން އިންތިޚާބުކޮށްފައިވެއެވެ.
ރައްޔިތުންގެ މަޖިލީހުގައި އެމްޑީޕީގެ 65 މެންބަރުން ތިއްބަވައެވެ.
ޕީޖީގެ މަސްއޫލިއްޔަތަކީ ރައްޔިތުންގެ މަޖިލީހުގައި އެމްޑީޕީގެ ހިޔާލުފާޅުކުރުމާއި ވޯޓު ދިނުމުގައި ޕާޓީގެ ސިޔާސަތަށް ތަބާވުމަށް ބާރު އެޅުވުމެވެ.
