މޭޔަރު މާދަމާ ވިލިމާލެއަށް ވަޑައިގަންނަވަނީ
މާލެ ސިޓީގެ މޭޔަރު ޑރ.މުހައްމަދު މުއިއްޒު މާދަމާ ވިލިމާލެ ވަޑައިގަންނަވާ ގޮތަށް ހަމަޖެހިއްޖެއެވެ.
ސިޓީ ކައުންސިލުން ބުނީ މާދަމާ ހެނދުނު މޭޔަރު ވިލިމާލެއަށް ކުރައްވާ ދަތުރުގައި، ގިނަ ކަންކަން ކުރެއްވުމަށް އިންތިޒާމް ކުރެވިފައިވާ ކަމަށެވެ.
އެގޮތުން މާދަމާ ހެނދުނު 9:45 ގައި، ސިނަމާލެ4ގެ އޮފީސް ހުޅުވައިދެއްވައި، ސިނަމާލެ4ގައި ދިރިއުޅޭ ރައްޔިތުންނާ ބައްދަލު ކުރައްވާނެއެވެ.
މި ހަރަކާތުގެ ތެރެއިން، މި ފްލެޓްތަކުގައި ދިރިއުޅޭ މީހުން، ފްލެޓްތައް އަމިއްލަ ކުރުމުގެ އެއްބަސްވުމުގައި ސޮއިކުރުން ވެސް އޮންނާނެއެވެ.
މީގެ އިތުރުން، ވިލިމާލޭގައި ގާއިމުކުރުމަށް ހަމަޖެހިފައިވާ، މޯލްޑިވްސް އިސްލާމިކް ބޭންކްގެ އޭޓީއެމްއާއި، ވިލިމާލޭގެ ވަގުތީ މާރުކޭޓުގެ ބިންގާ އަޅުއްވައިދިނުން ހެނދުނު 10:00ގައި އޮންނާނެއެވެ. އަދި އެއަށް ފަހު މަގުމަތީ ރޭމްޕްގެ މަސައްކަތް އިފްތިތާހު ކުރެއްވުމަށް ވެސް ވަނީ ހަމަޖެހިފައެވެ.
މާލެ ސިޓީ ކައުންސިލުން ބުނި ގޮތުގައި، މޭޔަރުގެ މި ދަތުރުގައި ވިލިމާލޭގެ ހުއިފިލަނޑާ އަދި ފައިބަރު މަސައްކަތް ކުރާ ސަރަހައްދު ވެސް ބައްލަވާލައްވާނެއެވެ. މޭޔަރުގެ ދަތުރު ނިންމަވައިލެއްވުމަށް ފަހު، މާލެ ވަޑައިގަތުމަށް ހަމަޖެހިފައިވަނީ މާދަމާ މެންދުރު 14:00ގައެވެ.
