"ޒަކާތު ނަފާ" ޕްރޮގްރާމް ފަށައިފި
އިކޮނޮމިކް މިނިސްޓްރީއާއި، އިސްލާމިކް މިިނިސްޓްރީން ގުޅިގެން "ޒަކާތު ނަފާ"ގެ ނަމުގައި ޒަކާތު ފަންޑު މެދުވެރިކޮށް ފަޤީރުންނާއި މިސްކީނުންނަށް މާލީ އެހީތެރިކަން ފޯރުކޮށްދޭ ހާއްސަ ޕްރޮގްރާމެއް ފަށައިފިއެވެ.
މި ޕްރޮގްރާމަކީ މިނިސްޓްރީ އޮފް އިސްލާމިކް އެފެއާޒުން އެކުލަވައިލައިފައިވާ ފަޤީރުންގެ ދަފްތަރުގައި ހިމެނޭ މީހުންނަށް އަމާޒު ކުރެވިގެން ކުރިޔަށް ގެންދާ ޕްރޮގަރާމެވެ.
އިސްލާމިކް މިނިސްޓްރީން ވިދާޅުވީ، ޒަކާތު ފަންޑުން އެހީދިނުމުގައި އިސްކަންދޭނެ ދާއިރާތައް ކަނޑައެޅުމުގައި ބަލާނީ ގައުމީ ތަރައްޤީއަށާއި މުޖުތަމައުގެ ފުދުންތެރިކަން އިތުރުކުރެވޭނެ ދާއިރާތަކަށް ކަމަށެވެ. މިގޮތުން ފުރަތަމަ ފިޔަވަހީގައި 2021-2022ގައި ހިންގާނެ ޕްރޮގްރާމްތަކުގައި ގެދޮރުން އާމްދަނީ, ޕޯލްޓްރީ ފަރމިންގ, ހައިޑްރޯފޯނިކްސް ދަނޑުވެރިކަން, ފަރުމަސްވެރިކަން, ފެހުން, ތަމްރީން/ "އޮން ދަ ޖޮބް" ޓްރައިނިންގ / އެޕްރެންޓިސްޝިޕް ފުރުސަތުތައް ހޯދައިދިނުން ހިމެނޭނެ ކަމަށް މިނިސްޓްރީން ވިދާޅުވިއެވެ.
އެ މިނިސްޓްރީން އިތުރަށް ވިދާޅުވީ، މި ޕްރޮގްރާމް ކުރިޔަށް ގެންދިޔުމަށް ހަމަޖެހިފައި ވަނީ ކަނޑައެޅޭ ވަކި އުޞޫލެއްގެ ތެރެއިން އަދި ކަނޑައެޅޭ ވަކި ޢަދަދެއްގެ ބަޔަކަށް ޒަކާތު ފަންޑުން ހަރަދުކޮށް، ޒަކާތުގެ ފައިދާ އޭގެ އެންމެ ޙައްޤުވެރި ފަރާތްތަކަށް ފޯރުކޮށްދިނުމަށާއި، އެ ފަރާތްތަކަށް އާމްދަނީ ހޯދޭނެ މަގެއް ފަހިކޮށްދިނުމަށާއި އަދި ފުދުންތެރި މުޖުތަމަޢުއެއް ބިނާކުރުމަށް ކަމަށެވެ.
Ads by STO
