ރައީސް ނަޝީދަށް ތާއީދުކުރައްވާ މެމްބަރުންގެ މަސައްކަތަކީ ސަރުކާރު ވައްޓައިލާން ހިންގާ ޖަރީމާއެއް: ޝަރީފް
ރައްޔިތުންގެ މަޖިލީހުގައި ތިއްބަވާ މޯލްޑިވިއަން ޑިމޮކްރެޓިކް ޕާޓީ(އެމްޑީޕީ)ގެ ބައެއް މެމްބަރުންގެ ފަރާތުން ފެނިގެންދަނީ އިދިކޮޅު ޕާޓީއެއްގެ މެމްބަރުން ދައުރު ކަމަށާއި އެ މެމްބަރުން މަސައްކަތް ކުރައްވަނީ ސަރުކާރު ވައްޓައިލާންކަމަށް މަރަދޫ ދާއިރާގެ މެމްބަރު އިބްރާހީމް ޝަރީފް ވިދާޅުވެއްޖެއެވެ.
ޝަރީފް މިހެން ވިދާޅުވީ އެމްޑީޕީގެ އެތެރޭގެ އިންތިޚާބާ ގުޅިގެން ބައެއް މީހުން ވަޒީފާއިން ވަކިކޮށް ބިރު ދައްކާކަމަށް ބުނެ އުނގޫފާރު ދާއިރާގެ މެމްބަރު މުޙައްމަދު ވަޙީދު މިއަދު ހުށަހެޅުއްވި ކުއްލި މައްސަލައަށް ބަހުސް ކުރައްވަމުންނެވެ.
މި މައްސަލައިގައި ވާހަކަ ދައްކަވަމުން ޝަރީފް ވިދާޅުވީ އަމިއްލަ ދަރިއަކަށް ވިޔަސް އަދި ޕާޓީގެ މެމްބަރަކަށް ވިޔަސް ޙަވާލުކުރެވިފައިވާ މަސްޢޫލިއްޔަތު އަދާ ނުކުރެވޭ ނަމަ ވަޒީފާއިން ދުރުކުރަން ޖެހޭނެ ކަމަށާއި އެއީ ރައީސުލްޖުމްހޫރިއްޔާ ކުރައްވާން ޖެހިވަޑައިގަންނަވާނެ ކަމެއް ކަމަށެވެ.
"ގާނޫނު އަސާސީގެ 115ވަނަ މާއްދާގެ ދަށުން ރައީސުލް ޖުމްހޫރިއްޔާއަށް ލިބިދީފައިވާ ހަނި ފުރުސަތު ، އެ ނިގުޅައިގަނެ ، އަތްފައި ބުރިކޮށް ، މި މަޖިލީހުގައި އިދިކޮޅު ޕާޓީއެއްގެ ދައުރު ، ވެރިކަންކުރާ ޕާޓީން އަދާކުރާ ކަމީ ކަންބޮޑުވާން ޖެހޭ ކަމެއް، ބިރުވެރިކަމެއް، ނުރައްކާތެރިކަމެއް ، ސަރުކާރު ވައްޓައިލާން ، ރޭވިގެން ، ހިންގާ ޖަރީމާއެއްކަމަށް އަޅުގަނޑު މި ދަންނަވަނީ ކެރިހުރެ ސާބިތުކަމާ އެކީ" ޝަރީފް ވިދާޅުވިއެވެ.
ޝަރީފް ވިދާޅުވީ މިފަދަ މަންޒަރުތައް ކުރީން ވެސް ފެނިއްޖެކަމަށާއި ރައީސް މައުމޫން ޢަބްދުލްޤައްޔޫމްގެ ވެރިކަމުގައި އެ މަނިކުފާނު ވެރިކަމުން ދުރުކުރާން ވެސް އެފަދަ މަސައްކަތްތައް ކުރެއްވި ކަމަށެވެ.
"ހަމަ އެ މަސައްކަތް މިހާރު ފެށިގެން ، ސީދާ ދިވެހިރާއްޖޭގެ ރައީސުލްޖުމްހޫރިއްޔާއާ ދޭތެރޭގައި ހިންގާ އުދުވާނެއް" މިއަދު ހުށަހެޅި ކުއްލި މައްސަލައަށް ތާއީދު ކުރެއްވި ރައީސް ނަޝީދުގެ ފެކްޝަންގެ ބޭފުޅުންނަށް އިޝާރާތް ކުރައްވައި ޝަރީފް ވިދާޅުވިއެވެ.
Ads by STO
