އިލްޔާސް ބަލިކޮށް، އެމްޑީޕީގެ ޑެޕިއުޓީ ޕީޖީއަކަށް އަނދުން ހުސެއިން
އެމްޑީޕީގެ ޑެޕިއުޓީ ޕާލަމެންޓްރީ ލީޑަރުކަމަށް ހެންވޭރު ދެކުނު ދާއިރާ މެމްބަރު ހުސެއިން ޝަހީމް (އަނދުން ހުސެއިން) އިންތިޚާބު ވެއްޖެއެވެ.
އަނދުން ހުސެއިން މި މަޤާމަށް އިންތިޚާބުވެފައި ވަނީ ޑެޕިއުޓީ ލީޑަރުންގެ މަޤާމަށް ވާދަކުރެއްވި ބޭފުޅުންގެ ތެރެއިން ވޯޓު އެއްވަރުވި ދެ ކެނޑިޑޭޓުންގެ މެދުގައި އަލުން ބޭއްވި އިންތިޚާބުގައެވެ. އޭނާއާ ވާދަ ކުރައްވައިފައި ވަނީ ހުޅުދޫ ދާއިރާގެ މެމްބަރު އިލިޔާސް ލަބީބުއެވެ.
އަނދުން ހުސެއިނަށް މި އިންތިޚާބުގައި 38 މެމްބަރުންގެ ވޯޓު ވަނީ ލިބިފައެވެ. އެއީ އެމްޑީޕީގެ މަޖިލީހުގައި ހިމެނޭ 65 މެންބަރުންގެ ތެރެއިންނެވެ. އިލްޔާސް ލަބީބަށް ލިބިވަޑައިގެންނެވީ 25 ވޯޓެވެ.
އެމްޑީޕީގެ ޕީޖީގެ މަޤާމުގައި މި ވަގުތު ހުންނެވީ، ހިތަދޫ އުތުރު ދާއިރާގެ މެންބަރު މުޙައްމަދު އަސްލަމެވެ. އޭނާ އިންތިޚާބުވެފައި ވަނީ، އަލީ އާޒިމްއާ ވާދަ ކުރައްވާ ބޮޑު ތަފާތަކުންނެވެ. ޕީޖީ ގްރޫޕްގެ ދެ ޑެޕިޔުޓީންގެ ތެރެއިން އެއް މަގާމަށް އަލިފުށީ ދާއިރާގެ މެމްބަރު މުހައްމަދު ރަޝީދު ހުސެއިން ވަނީ އިންތިޚާބުވެފައެވެ.
Ads by STO
