3 ބައި އިލެކްޝަނެއްގެ ރީ-ރަޖިސްޓްރޭޝަނަށް ހުޅުވައިލައިފި
މިމަހުގެ 26ވަނަ ދުވަހު ބޭއްވުމަށް ހަމަޖެހިފައިވާ، 3 ރަށެއްގެ ބައި އިލެކްޝަންގެ ރީ-ރަޖިސްޓްރީވުމަށް ހުޅުވައިލައިފިއެވެ.
އިލެކްޝަންސް ކޮމިޝަނުން ވިދާޅުވީ ޅ.ކުރެންދޫ ކައުންސިލްގެ ރައީސް އިންތިޚާބުކުރުމަށް އިންތިޚާބު ބޭއްވުމަށާއި، ފ. ނިލަންދޫ އާއި ދ. މީދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު ބޭއްވުމަށް ރީ-ރަޖިސްޓްރީވުމަށް މިހާރު ހުޅުވައިފައިވާ ކަމަށެވެ.
ވޯޓުލާން ރަޖިސްޓަރީވެފައިވާ ތަން ނޫން އެހެން ތަނެއްގައި ވޯޓުލުމަށް ޓަކައި ރަޖިސްޓަރީވުމުގެ ފުރުޞަތު ހުޅުވައިފައި ވަނީ މިއަދުން ފެށިގެން މިމަހުގެ 14ވަނަ ދުވަހާ ހަމައަށެވެ.
މި އިންތިޚާބުތައް ބޭއްވުމަށް ހަމަޖެހިފައި ވަނީ މި މަހުގެ 26ވަނަ ދުވަހުއެވެ.
ރަޖިސްޓަރީވުމަށް އެދި ހުށަހަޅާނީ، ރަށަށް ނުވަތަ މާލެއަށް ރަޖިސްޓަރީވެފައިވާ ފަރާތްތަކުގެ ތެރެއިން ރަޖިސްޓަރީވެފައިވާ ތަން ނޫން އެހެން ތަނަކަށް ރަޖިސްޓަރީވާން އެދޭ ފަރާތްތައް އެކަނި ކަމަށް އިލެކްޝަން ކޮމިޝަނުން ވިދާޅުވިއެވެ.
