"އިންޑިއާ އައުޓް" ކެމްޕެއިންގެ ދަައުވަތު ނަޝީދަށް
"އިންޑިއާ އައުޓް" ކެމްޕެއިންގައި ބައިވެރިވެވަޑައިގަތުމުގެ ދަައުވަތު ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދަށް، އިދިކޮޅު ކޯލިޝަންގައި ހިމެނޭ ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) ދެއްވައިފިއެވެ.
އަދުރޭ މިފަދައިން ދައުވަތު ދެއްވައިފައި ވަނީ، އިންޑިއާ އައުޓް ހަރަކާތުގައި ޕީޕީއެމްގެ މެންބަރުން ބައިވެރި ނުވުމަށް ރައީސް ނަޝީދު އެދިލެއްވުމާ ގުޅިގެންނެވެ.
މިއަދު ކުރެއްވި ޓްވީޓެއްގައި އަދުރޭ ވިދާޅުވީ، ރައީސް ނަޝީދު ވެސް ހިއްސާވާ ރައީސް ޞާލިޙްގެ ސަރުކާރުން ދިވެހީންގެ މިނިވަންކަމާ އިސްތިގުލާލު ނަގައިލައި އަވަށްޓެރި އިންޑިޔާގެ އަޅުވެތިކަމުގެ ދަށަށް ގައުމު ގެންދިއުމަށް ހިންގަވާ ޖަރީމާތަކާ ދެކޮޅަށް ފާޅުގައި ތެދުވެ ވަޑައިގެން ދެއްވުމަށް އެދިވަޑައިގަންނަވާ ކަމަށެވެ.
ޕީއެންސީގެ ރައީސް އަބްދުއްރަޙީމް އަބްދުﷲ -- ދެން އިމޭޖްސް
އިދިކޮޅު ލީޑަރު، ރައީސް އަބްދުﷲ ޔާމީން މިއަދު އދ.މަހިބަދޫގައި އިންޑިއާ އައުޓް ހަރަކާތް ކުރިޔަށް ގެންދިއުމަށް ވަނީ ރާވައިފައެވެ.
އެކަމާ ގުޅިގެން ރައީސް ނަޝީދު މިއަދު ކުރެއްވި ޓުވީޓެއްގައި ވިދާޅުވީ އިންޑިއާ އައުޓް ހަރަކާތަކީ ދިވެހިންނަށް ގެއްލުން ދޭނެ ހަރަކާތެއް ކަމަށެވެ. ނަޝީދު ވަނީ އެ ހަރަކާތުގައި ބައިވެރި ނުވުމަށް އިލްތިމާސްކުރައްވައިފައެވެ.
ރައީސް ޔާމީން އިންޑިއާއާ ދެކޮޅަށް ހިންގަވާ ހަރަކާތަކީ ރައްޔިތުންގެ ތާއީދު ނެތް، ދިވެހިންނަށް އޭގެން ގެއްލުން ދޭނެ ކަމެއް. ޕީޕީއެމްގެ މެންބަރުން ކިބައިން ވަރަށް އިހްލާސްތެރިކަމާ އެކު އަޅުގަނޑު އެދެނީ ގައުމުތަކާ އިދިކޮޅު ހަރަކާތުގައި ބައިވެރި ނުވުމަށް
ރައީސް ނަޝީދު ވިދާޅުވިއެވެ.
ރައީސް ޔާމީން މިނިވަންވި ފަހުން އިންޑިއާ އައުޓްގެ ހަރަކާތްތައް އަތޮޅުތެރޭގެ ރަށްތަކަށް ވަނީ ފުޅާ ކުރައްވައިފައެވެ. އަދި ކޮންމެ ހުކުރު ހޮނިހިރެއްގައި އަތޮޅު ތެރޭގެ އެކި ރަށްރަށަށް ވަޑައިގެން އެ މަނިކުފާނު ގެންދަވަނީ މި ކެންޕެއިން ކުރައްވަމުންނެވެ.
