ކެމްޕެއިނަށް އިންތި ހުވަދޫ އަތޮޅަށް!
އެމްޑީޕީގެ ޗެއަރޕާސަންގެ އިންތިޚާބުގައި ވާދަކުރައްވާ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ ކެމްޕެއިން ދަތުރުފުޅެއްގައި ހުވަދޫ އަތޮޅަށް ވަޑައިގެންފިއެވެ.
އިންތިގެ ކެމްޕެއިން ޓީމުން ބުނީ ގއ. އަދި ގދ.އަތޮޅަށް ކުރައްވާ މި ކެމްޕެއިން ދަތުރުގައި މި މަހުގެ 20ވަނަ ދުވަހާ ހަމައަށް އެ އަތޮޅުގެ އެކި ރަށްރަށަށް ދަތުރުކުރަން ހަމަޖެހިފައިވާ ކަމަށެވެ.
މި ދަތުރުގައި އިންތިގެ ކެމްޕެއިންގައި އިސްކޮށް އުޅުއްވާ ބޭފުޅުން ބައިވެރިވެވަޑައިގެންނެވިއެެވެ. އިންތި ވަނީ މީގެ ކުރިން އައްޑޫ ސިޓީއާއި ފުވައްމުލައް ސިޓީއަށް ވެސް ވަޑައިގެންފައެވެ.
އިންތިއާ އެކު ދެން ޗެއާޕާސަން ކަމަށް ވާދަކުރައްވަނީ އިކޮނޮމިކް މިނިސްޓަރު ފައްޔާޒު އިސްމާއީލްއެވެ.
އެމްޑީޕީގެ ޗެއަރޕާސަން ހޮވުމަށް ބާއްވާ އިންތިޚާބު ފަސް ކުުރަން އެ ޕާޓީގެ ޤައުމީ މަޖިލީހުން ވަނީ ނިންމައިފައެވެ. ކުރިން މި އިންތިޚާބު ބޭއްވުމަށް ހަމަޖެހި އޮތީ އޭޕްރީލް 16ވަނަ ދުވަހުއެވެ. ނަމަވެސް މިހާރު އެ އިންތިހާބު ބޭއްވުމަށް ކަނޑައަޅައިފައި ވަނީ ރަމަޟާން މަސް ނިމި ޝައްވާލްމަހުގެ ވެސް ފުރަތަމަ ހަތް ދުވަސް ނިމުމަށް ފަހު، މެއި މަހުގެ 14ވާ ހޮނިހިރު ދުވަހުގައެވެ.
