ރައްޔިތުންނަށް ފައިދާ ހުރި ކޮންމެ ކަމެއްގައި ސިޓީ ކައުންސިލުން އެއްބާރުލުންދޭނެ: ޝުޖާއު
ރައްޔިތުންނަށް ފައިދާ ހުރި ކޮންމެ ކަމެއްގައި ވެސް މާލެ ސިޓީ ކައުންސިލުން އެއްބާރުލުން ދޭނެ ކަމަށް ހުޅުމާލެ ދާއިރާގެ ކައުންސިލަރު އަދި ޕީއެންސީގެ ނައިބު ރައީސް އިބްރާހީމް ޝުޖާއު ވިދާޅުވެއްޖެއެވެ.
ސިޓީ ކައުންސިލްގެ 44ވަނަ ރަސްމީ އާއްމު ޖަލްސާގައި ވާހަކަ ދައްކަވަމުން ޝުޖާއު ވަނީ ސިޓީ ކައުންސިލަށް ޕްލޭނިންގ މިނިސްޓްރީން ކުރި ތުހުމަތުތަކަށް ރައްދު ދެއްވައިފައެވެ.
ޝުޖާއު ވަނީ ޕްލޭނިންގ މިނިސްޓްރީން ހިންގާ މަޝްރޫޢުތަކުގައި މާލެ ސިޓީ ކައުންސިލް ބައިވެރިނުކުރުމާއި، ލާމަރުކަޒީ ޤާނޫނުގައި ބުނާ ފަދައިން މަޝްވަރާ ކުރައްވައިފައި ނުވާކަމަށް ވިދާޅުވެ ކަންބޮޑުވުން ފާޅުކުރައްވައިފައެވެ.
"ލާމަރުކަޒީ ޤާނޫނުގައި ވަރަށް ސާފުކޮށް ބަޔާންކޮށްފައި އެބައޮތް މި ސަރަޙައްދުގައި މިހެން ހިންގާ މަޝްރޫޢުތަކުގައި ސިޓީ ކައުންސިލްގެ ބަސް ހޯދަން ޖެހޭނެ ކަމަށް. އެހެން ނަމަވެސް ތިލަމާލެ ބްރިޖާ ގުޅޭ މަޝްވަރާއެއް ރަސްމީ އަދި ނުރަސްމީ ސިފައެއްގައި ނަމަވެސް އަޅުގަނޑުމެންނާ ދިވެހި ސަރުކާރުން ކޮށްފައި ނުވާކަމީ ހިތާމަ ކުރާ ކަމެއް" އޭނާ ވިދާޅުވިއެވެ.
މީގެ އިތުރުން ވިލިމާލޭގެ ރައްޔިތުންގެ ބައްދަލުވުމުގައި އެ ރައްޔިތުން އެދިވަޑައިގެންނެވި ގޮތަށް އެބިމުގެ ބޭނުން އެންމެ ހެޔޮ ގޮތުގައި ކުރުމަށް މާލެ ސިޓީ ކައުންސިލުން ކުރަމުންދާ މަސައްކަތަށް ދިވެހި ސަރުކާރުން، ޚާއްސަކޮށް ޕްލޭނިންގ މިނިސްޓްރީން ހުރަސްއަޅަމުން ދާކަމީ ވަރަށް ހިތާމަ ކުރައްވާ ކަމެއް ކަމަށް ޝުޖާއުގެ ވާހަކައިގައި ވިދާޅުވިއެވެ.
ވިލިމާލޭގެ ސިނާޢީ ސަރަޙައްދުން ވިލިމާލޭގެ ރައްޔިތުންނަށް ބިން ދޫކުރުމަކީ ދާއިރާގެ ރައްޔިތުން ވެސް އަދި ކައުންސިލުން ވެސް ތާއީދު ކުރާ ކަމެއްކަމަށް ޝުޖާއު ވިދާޅުވިއެވެ.
އެހެން ނަމަވެސް ވިލިމާލޭގެ ރައްޔިތުންގެ އެދުމާ އެއްގޮތަށް މަސައްކަތް ކުރަން ކައުންސިލުން ފެށުމާ އެކު ބްރިޖް އެޅުމުގެ ނަމުގައި،ވިލިމާލޭން ބިން ދޫކުރުމަށް ޕްލޭނިންގ މިނިސްޓްރީން ހުރަސް އަޅާކަން މިނިސްޓްރީގެ ސިޓީއިން ދޭހަވާ ކަމަށް ޝުޖާއު ވަނީ ވިދާޅުވެފައެވެ.
މާލެ ސިޓީ ކައުންސިލްގެ ލޭންޑްޔޫސް ޕްލޭނަށް މިނިސްޓްރީން ކޮމެންޓެއް ކުރީ ވެސް މިނިސްޓްރީއަށް ހުށަހެޅިތާ 2 މަސް ފަހުން ކަމަށާއި، އެ ކޮމެންޓްތަކުގައި ހުރީ ފޯނުކޮށްލައިގެން ރަނގަޅު ކޮށްލެވޭ ކަންކަން ކަމަށް ވެސް ޝުޖާއު ވިދާޅުވިއެވެ.
އަދި މިނިސްޓްރީއިން ފާހަގަކުރި ކަންކަމަކީ ޗާޓަށް ބޮޑެތި ބަދަލުތަކެއް އަންނަކަމެއް ނޫން ކަމަށާއި، އެއީ ލޭންޑް ޔޫސް ޕްލޭން ފާސްނުކޮށްދޭން މިނިސްޓްރީން ކުރެއްވި ކަމެއް ކަމަށް ޝުޖާއު ވަނީ ތުހުމަތު ކުރައްވައިފައެވެ.
އަދި އިއްތިފާގުން 3 މަސް ފަހުން ލޭންޑްޔޫސް ޕްލޭން ފާސް ވާނެކަމަށް ޤާނޫނުގައި ބުނާތީ އެ މުއްދަތު ހަމަވާން ގަޑިއިރަކަށް ވުމުން މިނިސްޓްރީން އެކަން ކުރެއްވީ ކަމާއި، މިނިސްޓްރީން އެދިވަޑައިގެންފައިވާ ފަދައިން ކޮމެންޓް ދެއްވިތާ ޒަމާންތަކެއް ވެފައިވާކަމަށާއި، އެންމެ ފަހުން ޕްލޭނިންގ މިނިސްޓްރީން ކައުންސިލަށް ފޮނުވި ސިޓީއަށް ވަނީ ޖަވާބު ފޮނުއްވައިފައިކަން ޝުޖާއު ފާހަގަކުރެއްވިއެވެ.
ޝުޖާއު އިތުރަށް ވިދާޅުވީ ޕްލޭނިންގ މިނިސްޓްރީން ކުރައްވާ ކަންކަން މާލޭގެ ރައްޔިތުންނަށް ސާފުވާން ޖެހޭނެ ކަމަށެވެ.
