ޝަމީތާއާއި ރާކޭޝްގެ ލޯބީގެ ގުޅުމުގެ ދެމެދަށް ވަން ތިންވަނަ ފަރާތަކީ އާއިލާ
ބޮލީވުޑްގެ ލޯބިވެރިންގެ ވާހަކަތަކަށް ބަލާއިރު، މިދުވަސްކޮޅު އެންމެ ގިނައިން ދެކެވޭ އެއް ވާހަކައަކީ ބިގްބޮސް އޯޓީޓީގެ ތެރެއިން ގުޅުން އުފެދުނު ޝަމީތާ ޝެޓީއާއި ރާކޭޝް ބަޕަތުގެ ގުޅުން ހީނަރުވެ، ވަކިވުމާ ހަމައިގައި އޮތް ކަމުގެ ވާހަކައެވެ.
ޝަމީތާއާއި ރާކޭޝް ޖޯޑެއްގެ ގޮތުގައި ބިގްބޮސްއިން ފެނިގެން ދިޔައީ އެކަކު އަނެކަކަށް ހިތްވަރު ދިނުމުގެ ގޮތުންނެވެ. ނަމަވެސް ދެމީހުންގެ މެދުގައި ލޯބި އިތުރުވެ، ޝޯ ނިމުމުން ވެސް އެ ގުޅުން ގާއިމުވެ އޮތެވެ.
އޭގެ ފަހުން ބިގްބޮސް 15އަށް ޝަމީތާ ގޮސް، އެ ތަނުގައި ބަންދުވެފައި ހުރި ދުވަސްތަކުގައި ވެސް، ބޭރުގައި ހުރެގެން ރާކޭޝް ޝަމީތާއަށް ސަޕޯޓު ހޯދައިދިނުމަށް މަސައްކަތް ކުރިއެވެ.
ނަމަވެސް މިހާރު މި ދެމީހުންގެ ގުޅުން ވަނީ ވަރަށް ބޮޑަށް ހީނަރުވެފައެވެ. ދެމީހުން ވަކިވެއްޖެ ކަމަށް ޕިންކްވިލާގައި ލިޔެފައިވީ ނަމަވެސް، އެ ރިޕޯޓު ދެމީހުން ވެސް ދޮގު ކުރިއެވެ.
ޕިންކްވިލާއާ ޚިލާފަށް ރާކޭޝްގެ ގާތް އެކުވެރިއަކު އެހެން މީޑިއާއަކަށް މައުލޫމާތު ދެމުން ބުނީ، ޝަމީތާގެ އާއިލާއަކީ މިހާރު ވެސް އިންޑިއާގައި ނަން ހިނގާ އާއިލާއަކަށްވުމުން، އެ އާއިލާއަށް ވަންނަން ރާކޭޝްއަށް ދަތިތަކަކާ ކުރިމަތިވެފައިވާ ކަމަށެވެ.
އެކަމުގެ ސަބަބުން ދެމީހުންގެ މެދުގައި ބޮޑެތި މައްސަލަތަކެއް ޖެހިފައިވާ ކަމަށް ވެސް އޭނާ ބުނެފައިވެއެވެ.
