ހަރަކާތް ނުުހުއްޓުވޭނެ، ފަތާފައި ވެސް މާލެ އަރާނެ: ޝުޖާއު
އިދިކޮޅުން މިއަދު ބޭއްވުމަށް ހަމަޖެހިފައިވާ "ނޭވާހޮޅިއަށް" އިޙްތިޖާޖު ހުއްޓުވުމަށް މާލޭގެ ނެރު ބަންދުކުރަން ފުލުހުންނާއި ސިފައިން މަސައްކަތް ކުރަމުން އަންނަ ކަމަށާއި ނަމަވެސް، މިކަން ކުރިޔަސް ހަރަކާތް ނުހުއްޓުވޭނެކަމަށް ޕީއެންސީގެ ނައިބު ރައީސް، މާލޭ ކައުންސިލް މެންބަރު އިބްރާހީމް ޝުޖާއު ވިދާޅުވެއްޖެއެވެ.
ރޭ ބޭއްވި ޖަލްސާގައި ވާހަކަފުޅު ދައްކަވަމުން ޝުޖާ ވިދާޅުވީ، އިދިކޮޅުގެ މި ހަރަކާތަކީ ޤާނޫނާ ޚިލާފު ހަރަކާތެއް ކަމަށް ބުނެވޭނެ ޖާގައެއް ނެތް ކަމަށެވެ. އަދި އެފަރާތުން ކުރަމުން އަންނަ މަސައްކަތަކީ ސަރުކާރު އިސްލާޙް ކުރުމުގެ މަސައްކަތް ކަމަށާއި އެ މަސައްކަތަކީ ޤާނޫނުން އިދިކޮޅުގެ މައްޗަށް ލާޒިމް ކަމެއް ކަމަށް ވިދާޅުވިއެވެ.
ޝުޖާގެ ވާހަކަފުޅުގައި ވިދާޅުވީ، އިދިކޮޅުގެ ހަރަކާތަކީ ސަރުކާރު ވައްޓައިލާން ހިންގާ ހަރަކާތެއް ނޫން ކަމަށާއި އެކަހަލަ ނިޔަތެއް ވެސް ނެތް ކަމަށެވެ. އަދި އަތޮޅުތަކުން ވީހައި ވެސް ގިނަ ބަޔަކު ހަރަކާތުގައި ބައިވެރިވާން މާލެ އައުމަށް ޝުޖާ ގޮވައިލެއްވިއެވެ.
"މާދަމާ ރައްޔިތުން މާލެ އަންނަން އެބަޖެހޭ. މާލެ އައިސްގެން މިކަން ކުރެވޭނީ، މާލޭގައި އޮތީ ވެރިކަން، މާލެ އައިސް ވެރިކަން އިސްލާޙް ކުރަން އެބަޖެހޭ" ޝުޖާ ވިދާޅުވީ، މި ހަރަކާތް ހުއްޓައިލެވޭނެ ގޮތެއް ނެތް ކަމަށެވެ.
"އަޅުގަނޑުމެންނަށް އެނގޭ މާލޭގެ ނެރު ބަންދު ކުރަން ކޯސްޓް ގާޑުން ނިކުންނަކަން. އެހެންވީމަ ބަންދުކޮށްފިއްޔާ ފުންމައިލާނީ އެންމެން، ފުންމައިލައިގެން ފަތާފައި މާލެ އަރާނީ. އެހެން ވެސް އެބަޖެހޭ މި ވެރިކަން އިސްލާޙް ކުރަން"
