ޕްލޭނިންގ މިނިސްޓްރީގެ ތުހުމަތުތަކަށް މޭޔަރު މުޢިއްޒު ރައްދު ދެއްވައިފި
ތިލަމާލެ ބްރިޖް މަޝްރޫޢަށް މާލެ ސިޓީ ކައުންސިލުން ހުރަސް އަޅަމުންދާ ކަމަށް ބުނެ، ޕްލޭނިންގ މިނިސްޓްރީން ކުރަމުންދާ ތުހުމަތަށް މާލެ ސިޓީގެ މޭޔަރ ޑރ. މުޙައްމަދު މުޢިއްޒު ރައްދު ދެއްވައިފިއެވެ.
މާލެ ސިޓީ ކައުންސިލުން ވިލިމާލޭގެ ދެކުނު ފަރާތުގައި އޮންނަ ސިނާޢީ ސަރަޙައްދު ހުސްކޮށް އިޤްތިޞާދީ މަސައްކަތްކުރުމަށް ހުސްކޮށް ހުރި 13 ސްލޮޓް ސިނާޢީ އެކި މަސައްކަތްތައް ކުރުމަށް ކުއްޔަށް ދިނުމަށް ފުރުސަތު ހުޅުވައިލުމާ އެކު ޕްލޭނިން މިނިސްޓްރީން ވަނީ އެކަން ހުއްޓުވުމަށް ފަހު "ތިލަމާލެ" ބްރިޖްގެ މަޝްރޫޢުއަށް މާލެ ސިޓީ ކައުންސިލުން ހުރަސްއަޅާކަމަށް ވިދާޅުވެފައެވެ.
އެ މިނިސްޓްރީން ވަނީ ވިލިމާލެ ސިނާއީ ސަރަޙައްދު، ބްރިޖް މަޝްރޫޢުއަށް ބޭނުންވާ ކަމަށާއި، އެކަން ސިޓީ ކައުންސިލަށް ވެސް އަންގަވައިފައިވާނެ ކަމަށް ވިދާޅުވެފައެވެ.
މިކަމާ ގުޅިގެން މޭޔަރު ވިދާޅުވީ ވިލިމާލޭގެ ސިނާޢީ ސަރަޙައްދުގެ ބައެއް ބިންތައް ހުސްކޮށް ހުރުމުން، މާލޭގެ ރައްޔިތުންނަށް އެ ތަންތަނުގެ ބޭނުން ކުރުމުގެ ފުރުސަތު ދޭން އެކައުންސިލުން އިއުލާނު ކުރިއިރު، އެ ސަރަޙައްދު، ބްރިޖް މަޝްރޫޢުއަށް ބޭނުންވާނެކަން މިނިސްޓްރީއިން ސިޓީ ކައުންސިލަށް އަންގަވައިފައި ނުވާ ކަމަށެވެ.
”އަޅުގަނޑުމެންނަކީ ތަރައްޤީގެ ފިކުރުގެ މީހުން. އަޅުގަނޑުމެން ބޭނުން ވަނީ ތަރައްޤީއާ އެކީގައި ކުރިއަށްދާން. ނަމަވެސް ސަރުކާރުގެ ބައެއް ވުޒާރާތަކުން އަޅުގަނޑުމެންނަށް އެބަ އިނގިލި ދިއްކުރޭ، އަޅުގަނޑުމެންނަކީ ތަރައްޤީއާ ދެކޮޅު ހަދާ، ބްރިޖު އެޅުމާ ދެކޮޅު ހަދާ، މިވެނި މަޝްރޫއަކަށް ހުރަސް އަޅާ ބައެއް ކަމަށް. މީ އަޅުގަނޑުމެން ހިތާމަ ކުރާ ކަމެއް” މޭޔަރ ވިދާޅުވިއެވެ.
ސިޓީ ކައުންސިލުން ކުރިއަށް ގެންދާ މަސައްކަތްތަކަށް ސަރުކާރުގެ އެއްބާރުލުން ނުލިބޭކަމަށް ވިދާޅުވެ މޭޔަރުގެ އިތުރުން ކައުންސިލަރުން ވެސް އަންނަނީ ކަންބޮޑުވުން ފާޅުކުރަމުންނެވެ.
