މިރުޒާގެ މަރު: 9 އަހަރު ފަހުން ގާތިލުންނަށް ވާރިސުން މާފުދީފި
2011ވަނަ އަހަރު ވިލިމާލޭގައި ހިނގި މާރާމާރީއެއްގައި މަރުވި ނ. މާޅެންދޫ، ވައިޓް ހައުސް، އަހްމަދު މިރުޒާ މަރައިލި މައްސަލައިގައި މަރުގެ ހުކުމް އިއްވައިފައިވާ ގާތިލަކަށް ހުރިހާ ވާރިސުން މިއަދު މައާފުދީފިއެވެ.
މިރުޒާ މަރައިލިކަން ސާބިތުވެ، ކްރިމިނަލް ކޯޓުން މަރުގެ ހުކުމް އިއްވައިފައި ވަނީ ޏ. ފުވައްމުލައް ޒާވިއާ/ އަބްދުﷲ ނަޒީފް އަދި ވ. ފަޒީލާ މަންޒިލް މުހައްމަދު ޝިފާއުގެ މައްޗަށެވެ. އޭގެ ތެރެއިން ނަޒީފް މެރުމަށް ކުރި ހުކުމް ހައި ކޯޓުން ވަނީ ދަމަހައްޓައިފައެވެ. އެހެންކަމުން އެ މައްސަލަ ނަޒީފްގެ ފަރާތުން ސުޕްރީމް ކޯޓުގައި ވަނީ އިސްތިއުނާފްކޮށްފައެވެ.
ސުޕްރީމް ކޯޓުގައި މިއަދު މި މައްސަލައާ ގުޅިގެން އަޑުއެހުމެއް ބާއްވައިފައި ވަނީ މިރުޒާގެ ބައްޕަގެ ފަރާތުން ގާތިލަށް މައާފު ދީފައިވާކަމަށް ބުނެ ސިޓީއެއް ފޮނުވާފައިވާތީ އެކަން ސާފުކުރުމަށެވެ. އެގޮތުން މިރުޒާގެ ބައްޕައާއި އޭނާއާ އެއްބަނޑުއެއްބަފާ ތިން މީހުން މިއަދުގެ އަޑުއެހުމުގައި ވަނީ ބައިވެރިވެފައެވެ.
ފޮނުވި ސިޓީއާ ބެހޭ ގޮތުން ސުޕްރީމް ކޯޓުގެ ބެންޗުން މިރުޒާގެ ބައްޕައާ ސުވާލު ކުރުމުން ބުނީ ނަޒީފްގެ އާއިލާގެ ފަރާތުން މައާފަށް އެދި ދެއްކި ވާހަކަތަކުން ވަރަށް ދެރަވި ކަމަށާއި އެހެންކަމުން މައާފު ދިނީ ކަމަށެވެ. އަދި މައާފު ދިނުމުގެ ކުރިން ދީނީ އިލްމުވެރިޔެއްގެ ލަފާ ވެސް ހޯދި ކަމަށް މިރުޒާގެ ބައްޕަ ބުންޏެވެ. އަދި އެއްވެސް މީހަކު މައާފު ދިނުމަށް ބިރު ދައްކައިފައި ވެސް ނުވާ ކަމަށް ވެސް ބުނެފައި ވެއެވެ.
Ads by STO
