ލަޔަކް އައިސީޔޫގައި، އާއިލާއިން އެދެނީ ދީލަތި ދުޢާއަށް!
ދުނިޔޭގައި ވެސް ވަރަށް މަދުން ނޫނީ ނުފެންނަ ހަމުގެ ބައްޔެއް ކަމަށްވާ ހާލެކްއަން އިކްތިއޯސިސް ތަހައްމަލް ކުރަމުންދާ ޔޫނުސް ލަޔަކް ފަރަހްއަށް ލޭގެ އިންފެކްޝަން ޖެހި ހާލު ދެރަވެ އައިސީޔޫއަށް ލައިފިއެވެ.
“ދެން”އަށް މަޢުލޫމާތު ދެމުން ލަކަޔްގެ މަންމަ ހައްވާ އުލާ އިބްރާހީމް މިއަދު ބުނީ ލަޔަކްއަށް ލޭގެ އިންފެކްޝަން ޖެހިފައިވާ ކަމަށާއި މިވަގުތު އޮތީ އައިސީޔޫގައި ކަމަށެވެ. އަދި ލަޔަކްގެ އޮކްސިޖަން ވެސް ދަށްވަމުން ދާކަމަށް އުލާ ބުންނެވެ. މިހާރު ޑޮކްޓަރުން މަސައްކަތް ކުރަމުން ދަނީ އިންފެކްޝަން ރަނގަޅު ކުރެވޭތޯ ކަމަށް އުލާ ބުންޏެވެ.
“ލޭގެ އިންފެކްޝަނެއް ޖެހިގެން ހާލު ދެރަވީ. މިހާރު އޮތީ އައިސީޔޫގައި. އޮކްސިޖަން ވެސް ދަށް ވަނީ މިހާރު. އިންފެކްޝަން ރަނގަޅު ކުރެވޭތޯ ޓްރައި ކުރަނީ”
އުލާ ބުނީ މިހާރު ލަޔަކް ފަރުވާ ހޯދަމުން ދަނީ ބެންގަލޫރުގެ ހޮސްޕިޓަލެއްގައި ކަމަށާއި ބެންގަލޫރަށް ދިޔައީ ލަޔަކްއަށް ނިއުމޯނިއާ ޖެހި، ހަންގަނޑު ވެސް ވަރަށް ބޮޑަށް އިންފެކްޓުވެގެން އިތުރު ފަރުވާއަށް ކަމަށެވެ. ލޭގެ އިންފެކްޝަން ޖެހިފައި ހުރިކަން އެނގުނީ އެ ހޮސްޕިޓަލުން ހެދި ޓެސްޓަކުން ކަމަށް އުލާ ބުންޏެވެ.
“މާޗް މަހުގެ 22ވަނަ ދުވަހު ބެންގަލޫރަށް އައީ. އައިސްފައި ޓެސްޓުތައް ހެދީ. ސްކިން ބައޮޕްސީ ވެސް ހަދައިފި. އޭގެ ނަތީޖާ އަދި ނުލިބޭ. މިހާރު ލަޔަކްއަށް ފީޑް ކުރަނީ ވެސް ފީޑިންޓިއުބަކުން”
ލޭގެ އިންފެކްޝަން ޖެހުމުން ހަށިގަނޑު ޖަރާސީމުތަކުން ދިފާއުކޮށްދޭ އިމިއުން ސިސްޓަމް، ލޭގެ ތެރެއަށް ވަރަށް ގިނަ ކެމިކަލްތައް ދޫކޮށްލައެވެ. މިކަމުގެ ސަބަބުން ހަށިގަނޑުގައި އިންފްލެމޭޝަން އުފެދި، ގެއްލުންތައް ކުރިމަތިވެއެވެ. މި އިންފެކްޝަންގެ ސަބަބުން ހަށިގަނޑުގެ އެތެރޭގެ ގުނަވަންތަކަށް ލޭ ދައުރުވުން ދަށްކޮށްދެއެވެ. އަދި އެގުނަވަންތަކަށް ބޭނުންވާ ނިއުޓްރިއެންޓްސްއާއި އޮކްސިޖަން ނުލިބުން ހިމެނެއެވެ.
މިހާރު ލޭގެ އިންފެކްޝަން ޖެހިފައިވާ ލަޔަކްއަށް ނިއުމޯނިޔާ ޖެހި ހާލު ދެރަވާން ފަށައިފައި ވަނީ މިދިޔަ މަހު ތެރޭގައެވެ. ނިއުމޯނިއާއަކީ ނޭފަތުގެ ވައިގެ ނާރުތައް އިންފްލެމޭޓް ކޮށްލާ އިންފެކްޝަނެކެވެ. މި ބަލީގެ ސަބަބުން ކެއްސައި، ހުން އައިސް، ފިނިވުން އަދި ނޭވާލާން އުނދަގޫވުން ފަދަ އަލާމާތްތައް މެދުވެރިވެއެވެ. ލަޔަކްއަށް ނިއުމޯނިއާ ޖެހި ހަންގަނޑު ވަރަށް ބޮޑަށް ވަނީ އިންފެކްޓުވެފައެވެ. ލަޔަކްގެ މަންމަ “ދެން”އަށް މީގެ ކުރިން ދިން އިންޓަވިއުއެއްގައި ބުނީ ލަޔަކްގެ ހަންގަނޑު އިންފެކްޓްވީ ވަރަށް ބޮޑަށް ރަނގަޅުވެފައި ހުއްޓާ ކަމަށެވެ.
ޔޫނުސް ލަޔަކަށް މާތް ﷲ އަވަސް ޝިފާއެއް މިންވަރު ކޮށްދެއްވައި މިދަތި އުނދަގޫ ޙާލަތުން އަވަސް މުސްތަޤުބަލެއްގައި ސަލާމަތް ކުރައްވާށިއެވެ. އާމީން!
ނާތް ﷲ ޔޫނުސް އަށް އަވަސް ޝިފާ ދެއްވާށި.އާމީން
ޢާއިލާއަށް ކެތްތެރިކަން ދެއްވާށި. އާމީން
ޔޫނުސް އައް އަވަސްޝިފާއަކައް އެދެން