ރާއްޖޭގައި ހައި އިމްޕެކްޓް ގްރާންޓްގެ 7 އައު މަޝްރޫއު ހިންގަން ނިންމައިފި
ރާއްޖޭގައި ހައި އިމްޕެކްޓް ގްރާންޓް ގެ7 އައު މަޝްރޫއު ހިންގަން ނިންމައިފިއެވެ.
އިންޑިއަން ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓް (އެޗް.އައި.ސީ.ޑީ.ޕީ)ގެ ގްރާންޓް އެސިސްޓަންޓް ސްކީމްގެ ދަށުން ހަތް އައު މަޝްރޫއެއް ފަންޑުކުރުމަށް ވަނީ ހަމަޖެހިފައެވެ. މި މަޝްރޫޢުތައް އިޢުލާންކުރެވިފައި ވަނީ އެކްސްޓަރނަލް އެފެއާރޒް މިނިސްޓަރ ޑރ. ޖައިޝަންކަރު ރާއްޖެއަށް ދާދިފަހުން ކުރެއްވެވި ދަތުރުފުޅުގައެވެ.
132 މިލިއަން އިންޑިއަން ރުޕީސް (27 މިލިއަން ދިވެހި ރުފިޔާ) ހިނގާނެކަމަށް އަންދާޒާކުރެވޭ މި 7 މަޝްރޫޢު ވަނީ ރާއްޖޭގެ 7 އަތޮޅަކަށް ބަހައިލެވިފައެވެ. އެއީ ހދ. އަތޮޅު، ނ. އަތޮޅު، ކ. އަތޮޅު، އދ. އަތޮޅު، ތ. އަތޮޅު، ގއ. އަތޮޅު އަދި ސ. އަތޮޅެވެ.
މި މަޝްރޫޢު ހިންގުމަށް ހަމަޖެހިފައިވާ ދާއިރާތަކަކީ ސިއްޙީ ޚިމަތާއި، ޒުވާނުން ކުރިއެރުވުމާއި ތަރިކަ ދިރުވައި އާލާކުރުމެވެ. މިގޮތުން ޤާއިމްކުރުމަށް ހަމަޖެހިފައިވާ ތަންތަނުގެ ތެރޭގައި ކުޅުދުއްފުށީ ހޮސްޕިޓަލުގައި އޯޑިއޮލޮޖީ ޔުނިޓް، ނ. ނިލަންދޫ މާބުދުގެ އާއި ތ.ދިޔަމިގިލީ ގަނޑުވަރުގައި ސައިޓް މިއުޒަމްތައް، ނ.މަނަދޫގައި މަލްޓި ސްޕޯޓްސް ކޮމްޕްލެކްސް، ހުޅުމާލެ ހޮސްޕިޓަލްގައި ޕްރޮސްޓިކްސް އަދި އޯރތޮޓިކްސް ފެސިލިޓީ، އދ.ދިއްގަރުގައި ޒުވާނުންގެ މަރުކަޒު، ގއ. ގެމަނަފުށީގައި ޒުވާނުންގެ މަރުކަޒު، އަދި އައްޑު އިކުއަޓޯރިއަލް ހޮސްޕިޓަލްގައި މެންޓަލް ހެލްތު ޔުނިޓް ހިމެނެއެވެ.
މި 7 މަޝްރޫއާ އެކު އިންޑިއަން ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓް( އެޗް.އައި.ސީ.ޑީ.ޕީ)އިން ރާއްޖެގައި ހިންގާ މަޝްރޫއުތަކުގެ އަދަދު 27އަށް އަރައެވެ.
މީގެ ތެރެއިން 2 މަޝްރޫޢުކަމަށްވާ 'ވިލުނު' ޑްރަގް ޑިޓޮކްސިފިކޭޝަން އެންޑް ރިހެބިލިޓޭޝަން ސެންޓަރާއި އައްޑޫ މީދޫގައި އިކޯ ޓުއަރިޒަމް ގޯން ވަނީ އެކްސްޓަރނަލް އެފެއާރޒް މިނިސްޓަރ ޑރ. ޖައިޝަންކަރު ދާދިފަހުން ކުރެއްވެވި ދަތުރުފުޅުގައި އިފްތިތާޙްކޮށްދެއްވައިފައި ވެއެވެ.
އެޗް.އައި.ސީ.ޑީ.ޕީއިން މަޝްރޫޢުތައް ހިންގާ ދާއިރާތަކުގެ ތެރޭގައި ހިމެނެނީ މަސްވެރިކަމާއި، އިކޯޓުއަރިޒަމް، ދެމެހެއްޓެނިވި ތަރައްޤީ، ދަނޑުވެރިކަން، ސަޤާފަތާއި ތަރަކީ، ސިއްޙީ، ރަށްރަށުގެ އިންފްރާސްޓްރަކްޗަރއާއި ތަޢުލީމުގެ ދާއިރާއެވެ.
ރާއްޖޭގައި ހިންގޭ އެޗް.އައި.ސީ.ޑީ.ޕީ މަޝްރޫޢުތަކަށް ޖުމްލަ155 މިލިއަން ދިވެހި ރުފިޔާ ކަނޑައެޅިފައިވެއެވެ.
27 ހައި އިމްޕެކްޓް މަޝްރޫޢުގެ އިތުރުން، އިންޑިއާގެ ފަރާތުން ފޯރުކޮށްދޭ 106 މިލިއަން ދިވެހި ރުފިޔާގެ ހިލޭ އެހީގެ ދަށުން އިތުރު 18 މަޝްރޫޢުއެއް ވަނީ ކަނޑައަޅުއްވައިފައެވެ.
އެޗް.އައި.ސީ.ޑީ.ޕީތައް ފަރުމާކުރެވުމަށް އިސްކަންދެވިފައިވަނީ އެރަށެއްގެ ބޭނުންތަކަށް ބަލައިފައެވެ. މީގެ ތެރެއިން ގިނަ މަޝްރޫޢުތައް ހިންގުމަށް ހަމަޖެހިފައި ވަނީ ލޯކަލް ކައުންސިލްތަކުންނެވެ.
