މިރޭ އިޙްޔާ ފޯރަމްގައި ތަޤުރީރު ކުރައްވާނީ ޑރ. އިބްރާހީމް ޒަކަރިއްޔާއާއި ޑރ. އަނާރާ
ރަމަޟާންމަހުގެ ރޭތައް އިޙްޔާ ކުރުމަށް ބާއްވާ ސިލްސިލާ ފޯރަމްތަކުގެ ތެރެއިން މިރޭ ބާއްވާ ފޯރަމްގައި ޑރ. އިބްރާހީމް ޒަކަރިއްޔާ މޫސާއާއި ޑރ. އަނާރާ ނަޢީމް ތަގްރީރްކުރައްވާނެކަމަށް އިސްލާމިކް މިނިސްޓްރީން ވިދާޅުވެއްޖެއެވެ.
މިރޭ އޮންނަ ފޯރަމްގައި ޑރ. އިބްރާހީމް ޒަކަރިއްޔާ މޫސާ އަދި ޑރ. އަނާރާ ނަޢީމް ތަޤުރީރް ކުރައްވާނީ "ހަށިގަނޑާއި ފުރާނައަކީ އަމިއްލަ މިލްކެއް ނޫން" މި މައުޟޫޢުއެވެ. މިރޭގެ ދަރުސް އޮންނާނީ އިސްލާމީ މަރުކަޒުގައެވެ.
ރަމަޟާންމަހުގެ ރޭތައް އިޙްޔާކުރުމަށް ކުރިއަށްގެންދާ އިޙްޔާ ފޯރަމްތައް މާލޭގެ އިތުރުން އަތޮޅުތަކުގެ ބައެއް ރަށްރަށުގައި ވެސް ކުރިއަށްގެންދެއެވެ. އެގޮތުން މިދިޔަ ހުކުރު ދުވަހުގެ ފޯރަމް ބާއްވައިފައި ވަނީ ކުޅުދުއްފުށީގައެވެ.
އަތޮޅުތަކުގައި ބާއްވާ މި ސިލްސިލާގެ ދަށުން ހަތަރު ސިޓީއާއި ރ.އުނގޫފާރުގައި ވެސް އިހްޔާގެ ދަރުސްތައް އޮންނާނެއެވެ. އައްޑޫ ސިޓީގައި އިޙްޔާ ފޯރަމް ބޭއްވުމަށް ހަމަޖެހިފައި ވަނީ މި މަހުގެ 15ވަނަ ދުވަހުގައެވެ. 22 އޭޕްރީލްގައި އޮނާނީ ފުވައްމުލަކު ސިޓީގައެވެ. އަދި 29 އޭޕްރީލްގައި ރ.އުނގޫފާރުގައި މި ފޯރަމް ކުރިއަށް ގެންދާނެއެވެ.
އިސްލާމިކް މިނިސްޓްރީން ވިދާޅުވީ، އާދިއްތަ އަދި ބުރާސްފަތި ދުވަހު އިޙްޔާ ފޯރަމްތައް ކުރިއަށްދާނީ މާލެ ސިޓީގެ އިސްލާމީ މަރުކަޒުގައި ކަމަށެވެ. އަދި ހުކުރު ދުވަހުގެ ރޭގެ އިޙްޔާ ފޯރަމްތައް ކުރިއަށް ގެންދާނީ ރަށްރަށުގައި ކަމަށެވެ.
