ސުލްތާން ނޫރައްދީނަށް ފެނިވަޑައިގެންނެވި ހުވަފެންފުޅު!
ތާރީޚް ބުނާ ގޮތުގައި ރަޞޫލުﷲ ޞައްލަﷲ ޢަލައިހި ވަސައްލަމްގެ މާތް، ސާފު ހަށިކޮޅު ވަގަށް ނެގުމަށް ފަސް ފަހަރެއްގެ މަތީން މަސައްކަތްކޮށްފައި ވެއެވެ. އެ ފަސްފަހަރު ވެސް އެކަން ކުރަން އުޅުނު މީހުންނަށް ވަނީ ނާކާމިޔާބީއާ ކުރިމަތިލާން ޖެހިފައެވެ. އެހެނީ އެ މާތް ހަށިކޮޅު ރައްކާތެރި ކުރެއްވުމަކީﷲގެ ވަޢުދުފުޅެކެވެ.
މި ބަލައިލަނީ ރަސޫލާ ޞައްލަﷲ ޢަލައިހި ވަސައްލަމްގެ ހަށިކޮޅު ވަގަށް ނެގުމަށް މަސައްކަތް ކުރި ތިންވަނަ ހާދިސާއަށެވެ. މި ހާދިސާ ހިނގައިފައި ވަނީ ހިޖުރީގޮތުން 557ވަނަ އަހަރުގައެވެ.
މިސްރުގައި އޭރު ވެރިކަން ކުރައްވަމުން ގެންދެވީ ސުލްތާން މަހުމޫދު ނޫރައްދީނެވެ. އެއީ ހެޔޮލަފާ ޞާލިޙް ބޭކަލެކެވެ.
އެއްރޭ ދަމުނަމާދު ކުރައްވައިގެން އަވަހާރަފުޅުގައި ވަނިކޮށް ނޫރައްދީނަށް ހުވަފެނެއް ފެނިވަޑައިގަތެވެ. އެ ހުވަފެނުގައި މަހުމޫދު ނޫރައްދީނަށް ފެނިވަޑައިގަތީ ރަސޫލާ ޞައްލަﷲ ޢަލައިހި ވަސައްލަމް ، އޭނާއާ މުޚާތަބު ކުރައްވަނިކޮށެވެ.
ރަސޫލާ ޞައްލަﷲ ޢަލައިހި ވަސައްލަމް ޙަދީޘް ކުރެއްވިއެވެ. "އޭ މަހުމޫދެވެ. މި ދެ މީހުންގެ ކިބައިން ތިމަންކަލޭގެފާނު ސަލާމަތްކޮށްދޭށެވެ."
މަހުމޫދު ނޫރައްދީނަށް ފެނިވަޑައިގަތީ ދޮން ދެމީހެކެވެ. އެ ހުވަފެން ތަކުރާރުކޮށް ތިން ފަހަރު ފެނުމުން ތެދުވެވަޑައިގަތް އެޑްވައިޒަރު ޖަމާލުއްދީން އަލްމަލްސިލީ ގާތުގައި މި ހުވަފެނުގެ ވާހަކަ ވިދާޅުވިއެވެ.
ޖަމާލުއްދީން އިރުޝާދު ދެއްވީ އެ ހުވަފެނުގެ ވާހަކަ އެއްވެސް މީހެއްގެ ގާތުގައި ނުބުނެ ، މަދީނާއަށް އަވަހަށް ދަތުރުފެއްޓެވުމަށެވެ.
20 މީހުންނާ އެކު ނޫރައްދީން މަދީނާއަށް ދަތުރު ފެއްޓެވިއެވެ. މަދީނާއަށް ފޯރާން 16 ދުވަސް ހޭދަވިއެވެ. އެއްވެސް އެންގެވުމެއް ނެތި ވަޑައިގަތް މަދީނާގެ ގަވަރުނަރަށް ކުއްލިއަކަށް ނޫރައްދީން ފެނިވަޑައިގަތުމުން ހައިރާންވެވަޑައިގެން ދަތުރުފުޅާ ގުޅޭ ގޮތުން ސުވާލު ކުރެއްވިއެވެ. ޖަވާބުގައި ހުވަފެނުގެ ވާހަކަ ނޫރައްދީން ވިދާޅުވެދެއްވިއެވެ.
ވައްކަންކުރަން އުޅޭ މީހުން ހޯދުމުގެ ގޮތުން އެ މީހުން ފެނިވަޑައިގަންނަވައިފި ނަމަ ނޫރައްދީނަށް އެނގިވަޑައިގަންނަވާނޭތޯ މަދީނާގެ ގަވަރުނަރު އެއްސެވިއެވެ. ޖަވާބުގައި އާނއެކޭ ވިދާޅުވުމުން މުޅި މަދީނާގައި އާންމުކޮށް ގޮވައިލެވުނެވެ. ސުލްތާން ނޫރައްދީން މަދީނާގެ އަހުލުވެރީންނަށް ހަދިޔާ ދެއްވަން ބޭނުންފުޅުވާ ކަމަށާއި ހަދިޔާއާ ހަވާލުވެލެއްވުމަށް އެންމެން ޙާޟިރުވުމަށެވެ.
ހަދިޔާއާ ހަވާލުވުމަށް އެތައް ބަޔަކު އައިސް ހިނގައްޖެއެވެ. ނަމަވެސް ހުވަފެނުން ފެނިވަޑައިގަތް ދެ މީހުންނެއް ނޫރައްދީނަކަށް ފެނިވަޑައެއް ނުގަތެވެ. އެހެންކަމުން ނޫރައްދީން ގަވަރުނަރުގެ އަރިހުގައި އެއްސެވިއެވެ. މަދީނާގައި އުޅޭ މީހުންނަކީ ހަމައެކަނި މިއީތޯއެވެ. ޖަވާބުގައި ގަވަރުނަރު ވިދާޅުވިއެވެ. ނޫނެކެވެ. މޮރޮކޯއިން ވަރަށް ފަހުން އައިސް އުޅޭ ހެޔޮ ލަފާ ދެ މީހަކު އެބައުޅެއެވެ. އެއީ މީހުންނަށް ޞަދަޤާތްދީ ނަމާދުކޮށް އަޅުކަމުގައި ގިނަ ވަގުތު ހޭދަކުރާ ދީލަތި ބައެކެވެ.
އެ ދެމީހުންނާ ބައްދަލުކުރުމަށް ނޫރައްދީން އެދިވަޑައިގަތެވެ. ވަގުތުން އެ މީހުންނާ ބައްދަލުކުރެއްވިއެވެ. އަދި އެއީ ހުވަފެނުން ފެނިވަޑައިގަތް ދެމީހުންކަން ޔަޤީންވިއެވެ. ނޫރައްދީން ގާފިލާގެ ޓީމާ އެކު އެ ދެ މީހުން ދިރިއުޅޭ ޓެންޓަށް ގޮސް އެތަން ބަލައި ފާސްކުރެއްވިއެވެ. އެއްވެސް އެއްޗެއް ފުރަތަމަ ފެނިވަޑައިނުގެންނެވި ނަމަވެސް ބަލައިފާސްކުރުން ފުޅާކޮށް ހިންގެވުމުން ތަޅުމުގެ ދަށުން އެތައް ބައިވަރު ފައިސާއެއް ފެނިވަޑައިގަތެވެ. އަދި ރަސޫލުﷲ ޞައްލަﷲ ޢަލައިހި ވަސައްލަމްގެ ގަބުރުފުޅާ ދިމާލަށް ބޮޑު ހޮހޮޅައެއް ކޮނެފައިވާ ތަން ފެނުނެވެ. އޭރު ހުރީ އެ ހިސާބާ ނުހަނު ގާތްވެފައެވެ.
އެންމެ ފަހުން މޮރޮކޯގެ ދެ މީހުން އެ މީހުންގެ ކުށަށް އިޢުތިރާފްވިއެވެ. އަދި އެ މީހުންނަކީ ކްރިސްޓިއަނުން ކަމަށާއި އެ މީހުން ބޭނުންވީ ރަސޫލާ ޞައްލަﷲ ޢަލައިހި ވަސައްލަމްގެ ހަށިކޮޅު ރޯމަށް ގެންދަންކަމަށް ބުންޏެވެ.
އެ މީހުންގެ މައްސަލަ ހިންގައި ކުށަށް އިއުތިރާފްވެ ކުށް ސާބިތުވުމުން ދެ މީހުންނަށް ވެސް މަރުގެ އަދަބު ދެވުނެވެ.
މި ހާދިސާއަށް ފަހު ނޫރައްދީން ވަނީ ރަސޫލާ ޞައްލަﷲ ޢަލައިހި ވަސައްލަމްގެ މަހާނަފުޅު ވަށައިގެން ރައްކާތެރިކަމުގެ ފާރެއް ހެދުމަށް އަމުރުކުރައްވައިފައެވެ.
އަލްމާއިދާ ސޫރަތުގައި މާތްﷲ ވަޙީ ކުރައްވައިފައި ވެއެވެ.
وَاللَّهُ يَعْصِمُكَ مِنَ النَّاسِ ۗ "އަދި ﷲ ، މީސްތަކުންގެ ކިބައިން ކަލޭގެފާނު ރައްކާތެރި ކުރައްވާނެތެވެ."
މީގެ އިތުރުން ވެސް ރަޞޫލުﷲ ޞައްލަﷲ ޢަލައިހި ވަސައްލަމްއަށް ގެއްލުންދޭ މީހަކަށް ދުނިޔެއާއި އާޚިރަތުގައި ވެސް ގެއްލެނެވި ކުރައްވާނެކަން ޤުރުއާންގެ އެތައް ތަނެއްގައި ﷲ ތަޢާލާ ވަނީ ވަޙީ ކުރައްވައިފައެވެ.
މި ހާދިސާއިން ލިބޭ އެއް ފިލާވަޅަކީ ރަސޫލުﷲ ޞައްލަﷲ އަލައިހި ވަސައްލަމައަށް ގެއްލުމެއް ލިބިދާނެކަމުގެ ކުޑަ ނަމަވެސް އިޝާރާތެއް ލިބިވަޑައިގެންފި ނަމަ އޭރުގެ ލީޑަރުން ނެންގެވި އަވަސް ފިޔަވަޅުތަކެވެ. އެކަމެއް ހުއްޓުވާން ކުރައްވާ ބުރަ މަސައްކަތެވެ.
މާޝާ ﷲ. އަލްހަމްދުލިﷲ
މާޝާﷲ އަލްޙަމްދުލިﷲ