އިނގިރޭސި ވިލާތުން ރާއްޖެ އަންނަ ފަތުރުވެރިންގެ އަދަދު މައްޗަށް
އިނގިރޭސި ވިލާތުން ރާއްޖެ އަންނަ ފަތުރުވެރިންގެ ޢަދަދު މައްޗަށްޖެހިފައިވާ ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.
ތަފާސްހިސާބުތައް ދައްކާގޮތުން އަހަރުގެ މިިހާތަނަށް ރާއްޖެއަށް ޖުމްލަ 531019 ފަތުރުވެރިން ވަނީ އައިސްފައެވެ. މިދިޔަ އަހަރު ރާއްޖެއަށް ޒިޔާރަތްކޮށްފައި ވަނީ 1,321,932 ފަތުރުވެރިންނެވެ.
އަހަރުގެ މިހައިތަނަށް ރާއްޖެއަށް އެންމެ ގިނަ އަދަދަކަށް ޒިޔާރަތްކޮށްފައި ވަނީ އިނގިރޭސިވިލާތު ފަތުރުވެރިންނެވެ. އިނގިރޭސިވިލާތުން ރާއްޖެއަށް 69808 ފަތުރުވެރިން އައިސްފައިވެއެވެ. ތަފާސްހިސާބުތައް ދައްކާގޮތުން މިދިޔަ އަހަރު އިނގިރޭސިވިލާތުން ރާއްޖެއަށް އައިސްފައި ވަނީ 62777 ފަތުރުވެރިންނެވެ.
ރާއްޖެއަށް ޒިޔާރަތްކުރާ ފަތުރުވެރިންގެ ތެރެެއިން ދެވަނައަށް އެންމެ ގިނަ ޢަދަދަކަށް ފަތުރުވެރިން އައިސްފައި ވަނީ އިންޑިއާއިންނެވެ. ތިންވަނައަށް އެންމެ ގިނަ އަދަދަކަށް ފަތުރުވެރިން އަންނަނީ ރަޝިއާއިންނެެވެ.
ޓޫރިޒަމް މިނިސްޓްރީން އާންމުކޮށްފައިވާ ތަފާސް ހިސާބުތައް ދައްކާގޮތުން މި އަހަރު ފެށުނު ފަހުން ރާއްޖެ އަންނަ ފަތުރުވެރިންގެ އަދަދު ވަނީ ވަރަށް ބޮޑަށް އިތުރުވެފައެވެ. އަދި ފަތުރުވެރިން ރާއްޖޭގައި ހޭދަކުރާ ދުވަސްތަކުގެ އަދަދު ވެސް ކުރީ އަހަރުތަކާ އަޅައިބަލާއިރު ވަނީ އިތުރުވެފައެވެ.
Ads by STO
