ނޫސްވެރިކަމުގެ މިިނިވަންކަމުގައި ރާއްޖެ 15 ދަރަޖަ ފަހަތަށް
ދުނިޔޭގެ ގައުމުތަކުގައި ނޫސްވެރިކަމުގެ މިނިވަންކަން އޮތް މިންވަރު ބަލައި، ކޮންމެ އަހަރަކު ނެރޭ "ވޯލްޑް ޕްރެސް ފްރީޑަމް އިންޑެކްސް" ރިޕޯޓްގައި ރާއްޖެ 15 ދަރަޖަ ފަހަތަށް ވެއްޓިއްޖެއެވެ.
މިއީ ޖުމްލަ 180 ގައުމު ހިމެނޭ މި ލިސްޓަށް ގައުމުތައް ދަރަޖަ ކުރިއިރު ފާއިތުވެ ދިޔަ ހަތަރު އަހަރުގެ ތެރޭގައި ރާއްޖެ ދަށަށް ދިޔަ ފުރަތަމަ ފަހަރެވެ. 2018ވަނަ އަހަރު މި ލިސްޓުން ރާއްޖެއަށް ލިބުނީ 120 ވަނައެވެ. އަދި 2019ވަނަ އަހަރު 98ވަނައަށް ޖެހިލިއެވެ. އޭގެ ފަހުން 2020ވަނަ އަހަރު 79ވަނައަށް އަރައި މިދިޔަ އަހަރު 72ވަނަ އަހަރު ލިބުނެވެ.
ނޫސްވެރިކަމުގެ މިނިވަންކަމުގައި ރާއްޖެ 15 ދަރަޖަ ފަހަތަށް ގޮސްފައިވާއިރު، މިއަދު ފާހަގަކުރަމުންދާ ނޫސްވެރިކަމުގެ މިނިވަންކަމުގެ ދުވަހާ ގުޅިގެން ދެއްވި ހިތާބުގައި ރައީސް އިބްރާހިމް މުހައްމަދު ސޯލިހު ވަނީ ރާއްޖެއަކީ ދެކުނު އޭޝިޔާގެ ޤައުމުތަކުގެ ތެރެއިން، ނޫސްވެރިކަމުގެ މިނިވަންކަމުގެ ޙައްޤު އެންމެ ފުރިހަމައަށް ލިބިދީފައިވާ ގައުމު ކަމަށް ވިދާޅުވެފައެވެ.
ރާއްޖޭގެ ހާލަތު ބެލުމަށް ފަހު، އިންޑެކްސްގައި ލިޔެފައިވާ ގޮތުން ރާއްޖޭގެ ގާނޫނު އަސާސީން ނޫސްވެރިންނަށް ކަށަވަރުކޮށްދީފައިވާ މިނިވަންކަމުގެ ހައްގު ހަނިވާނެ ގޮތަށް ހެއްކާ ބެހޭ ބިލެއް ރައްޔިތުންގެ މަޖިލީހަށް ހުށަހަޅާފައިވާ ކަމަށެވެ. އަދި ރައްޔިތުންގެ މަޖިލީހުގެ 241 ކޮމިޓީން ބެލި މައްސަލައެއްގައި "މިހާރު" ނޫހުގައި ލިޔެފައިވާ ލިޔުމެއްގެ މަސްދަރު ހޯދަން މަސައްކަތް ކުރިކަން ވެސް ފާހަގަކޮށްފައިވެއެވެ. މީގެއިތުރުން ހަރުކަށި ފިކުރުގެ މީހުންނާއި ގޭންގްތަކުން ނޫސްތަކަށް ބިރު ދެއްކުމާއި، ނޫސްވެރިޔާ އަހްމަދު ރިލްވާން ގެއްލުވައިލުމާއި، ސޯޝަލް މީޑިއާ ބްލޮގަރު ޔާމީން ރަޝީދު މަރައިލި މައްސަލަ ވެސް ރާއްޖެއާ ގުޅޭ މައްސަލަތަކުގެ ގޮތުގައި ފާހަގަކޮށްފައިވެއެވެ.
Ads by STO
