ފިހާރަތަކުން ކުނި ބިސް ވިއްކާތީ ސަމާލުވާން އެދިއްޖެ
ބައެއް ފިހާރަތަކުން ކުނިވެފައި ހުރި ބިސް ވިއްކާތީ އެކަމަށް ސަމާލުވުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)އިން އިލްތިމާސްކޮށްފިއެވެ.
އެމްއެފްޑީއޭގެ ބަޔާނެއްގައި ވިދާޅުވީ މާލޭގެ ފިހާރަތަކުން ވިއްކާ ބިސް ކުނިވެފައި ހުންނަކަމުގެ ޝަކުވާ ލިބެމުންދާ ކަމަށެވެ. އަދި އެކަމުގެ ގެއްލުން ބަޔާން ކުރެއްވިއެވެ.
"މިއީ އޭގެ ސަބަބުން އާންމު ސިއްހަތަށް ނޭދެވޭ އަސަރު ކުރާ އަދި ކާބޯތަކެތީގެ ޒަރީއާއިން ޖެހޭ ބަލިތައް ފެތުރޭ ފަދަ ނުރައްކާތެރި ހާލަތެއް މެދުވެރިމުގެ ފުރުސަތު އޮތް ކަމެއް" އެމްއެފްޑީއޭގެ ބަޔާނުގައި ވިދާޅުވިއެވެ.
އެފްޑީއޭއިން ވިދާޅުވީ ފިނިކޮށްފައި ހުންނަ ބިސް ރައްކާތެރިކަމާ އެކު ބެހެއްޓޭނީ ގިނަވެގެން ތިން މަސްދުވަހު ކަމަށެވެ. އަދި ފިނި ނުކޮށް ބިސް ބެހެއްޓޭނީ 28 ދުވަހުގެ މުއްދަތަކަށް ކަމަށް ވިދާޅުވިއެވެ.
"މުއްދަތު ހަމަނުވި ކަމުގައި ވިޔަސް، ހުންނަންޖެހޭ ފިނި ހޫނުމިނަށް ނުބަހައްޓާ ނަމަ ބިސް ކުނިވުމުގެ ފުރުސަތު ވެސް އޮންނާނެ" އެ ބަޔާނުގައި ވެއެވެ.
