މި އަހަރުގެ އަމީރުލްޙައްޖަކީ އިސްލާމިކް މިނިސްޓަރ ޑރ.ޒާހިރު
އަމީރުލް ހައްޖުގެ ގޮތުގައި މި އަހަރު އިސްލާމިކް އެފެއާޒް ޑރ. އަހުމަދު ޒާހިރު އަލީ ހަމަޖައްސައިފިއެވެ.
ރައީސް އޮފީހުން ވިދާޅުވީ މި އަހަރު ރާއްޖެއިން ޙައްޖަށްދާ މީހުންގެ ކަންތައްތައް އިސްކޮށް ބެލެހެއްޓެވުމަށް ޓަކައި އަމީރުލްޙައްޖުގެ ގޮތުގައި އިސްލާމިކް މިނިސްޓަރ ޑރ.ޒާހިރު ހަމަޖައްސަވައިފައިވާ ކަމަށެވެ.
ކޮންމެ އަހަރަކު ވެސް ދިވެހި ޙައްޖުވެރިންގެ ކަންކަމާ ޙަވާލުވެވަޑައިގަންނަވާނެ ދައުލަތުގެ އިސް މަސްއޫލުވެރިޔަކު ރައީސް ކަނޑައަޅުއްވައެވެ.
މިއަހަރު ރާއްޖެއިން މީހުން ޙައްޖަށް ގެންދިޔުމަށް ލިބިފައި ވަނީ 453 ޖާގައެވެ. އޭގެ ތެރެއިން 352 ޖާގަ ޚާއްސަކޮށްފައި ވަނީ ހައްޖު ކޯޕަރޭޝަންގެ ކިއުގައި މިވަގުތު ތިބި މީހުންނަށެވެ. އަދި ބާކީ 100 ޖާގައަށް އެދުމުގެ ފުރުޞަތު ހުޅުވައިލައި މިހާރު އަންނަނީ ފޯމް ބަލައިގަންނަމުންނެވެ. އަދި މި 100 މީހުން ހޮވުމަށް ހަމަޖެހިފައި ވަނީ އަންނަ މަހުގެ 2ވަނަ ދުވަހު ނަގާ ގުރުއަތުންނެވެ.
މިއަހަރު ރާއްޖެއިން ޙައްޖަށް ދިއުމަށް ފުރުޞަތު ލިބިފައިވާ މީހުންގެ ތެރެއިން ޙައްޖަށް ދާން ބޭނުންނުވާ ފަރާތްތަކުން އެކަން މިއަދުގެ ކުރިން ޙައްޖު ކޯޕަރޭޝަނަށް އެންގުމަށް ވަނީ އެދިފައެވެ.
