ނަބިއްޔާގެ ދިފާއުގައި އިދިކޮޅުން ޖަލްސާއެއް
ރަސޫލާ ޞ.ޢ.ވއަަށް ފުރައްސާރަކޮށް އިންޑިއާގެ ޓީވީ ޗެނަލްއެއްގައި ދެއްކި ވާހަކަތަކާ ގުޅިގެން ސިޔާސީ އިދިކޮޅު ފަރާތްތަކުން "ނަބިއްޔާގެ ދިފާއުގައި" ނަމުގައި ޖަލްސާއެއް ބާއްވަން ނިންމައިފިއެވެ.
މި ޖަލްސާ ބޭއްވުމަށް ހަމަޖެހިފައި ވަނީ އަންނަ ބުރާސްފަތި ދުވަހު ރޭ 20:30 ކާނިވަލް ސަރަހައްދުގައެވެ.
އިންޑިއާގެ ޓީވީ ޗެނަލެއްގައި ދެއްކި ޕްރޮގްރާމެއްގައި ރަސޫލާއަށް ފުރައްސާރަކޮށް ވާހަކަ ދައްކައިފައި ވަނީ ބީޖޭޕީގެ ނޭޝަނަލް ސްޕޯކްސްޕާސަން ނުޕުރް ޝަރުމާއާއި ނިއުދިއްލީގައި ހުނަން ބީޖޭޕީ ޕާޓީގެ މީޑިއާ އިންޗާޖް ނަވީން ކުމާރެވެ.
މި ޖަލްސާއާ ގުޅޭ ގޮތުން އިތުރު މައުލޫމާތު ދެއްވަމުން ކުރީގެ އިސްލާމިކް މިނިސްޓަރު އަދި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގެ އެޑްވައިޒަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ، ރާއްޖެއަކީ ސައްތައިން ސައްތަ މުސްލިމު ގައުމެއް ކަމަށާއި ކޮންމެ މީހަކު އިސްލާމް ދީނާއި ރަސޫލާއަށް ފުރައްސާރަ ކުރި ނަމަވެސް އިސްލާމީ ގައުމަކަށް އެކަމަށް އެކަށޭނަ ފިޔަވަޅު އެޅެން ޖެހޭނެ ކަމަށެވެ. އަދި ފިނި ބަޔާނެއް ނެރުމަކީ އެކަށީގެންވާ ފިޔަވަޅެއް ނޫން ކަމަށް ވެސް ވިދާޅުވިއެވެ.
"ކޮންމެ ކަހަލަ ރަހުމަތްތެރި ކަމެއް އޮތް ނަމަވެސް މިކަހަލަ ކަންކަމަށް ދޫދެވިގެން ނުވާނެ،" ޑރ. ޝަހީމް ވިދާޅުވިއެވެ.
ރަސޫލާއަށް އޮތް ލޯބި ދައްކައިދިނުމަށް ޖަލްސާ ބާއްވަނީ އިދިކޮޅު ކޯލިޝަނުން އިންތިޒާމުކޮށްގެން ކަމަށްވީ ނަމަވެސް އެއީ ސިޔާސީ ހަރަކާތެއް ނޫން ކަމަށް ވެސް ޝަހީމް ވިދާޅުވިއެވެ.
"އަޅުގަނޑުމެންގެ ހިތްތަކުގައި އެކަލޭގެފާނަށް އޮތް ލޯތްބާއި މަތިވެރިކަން ދެއްކުމަށް ޓަކައި އަޅުގަނޑުމެން އެބަ ޖެހޭ މި ވަގުތު ހިތްވަރާ އެކު ތެދުވަން،" ޝަހީމް ވިދާޅުވިއެވެ.
Ads by STO
