އައިއޯސީސީއާއި އިލްމް ގުޅިގެން ޕްރީ ސްކޫލް ފޮތް ސެޓެއް ތައްޔާރުކޮށްފި
އައިއޯސީސީގެ ތިންކު ޓޭންކާއި އިލްމު އިންސްޓިޓިއުޓް ގުޅިގެން ތައްޔާރުކުރަން ފެށި ޕްރީ ސްކޫލް ފޮތް ސެޓް ތައްޔާރުކޮށް ނިންމައިލައިފިއެވެ.
މި ފޮތްސެޓް ލިޔެ ތައްޔާރުކުރެއްވީ، ޕްރީ ސްކޫލްގެ ހުރިހާ މަރުޙަލާއެއްގެ ހުރިހައި މާއްދާއެއް ހިމެނޭ ގޮތުން، (އައިއޯސީސީގެ ތިންކު ޓޭންކު މެންބަރު، އަދި ނޭޝަނަލް އިންސްޓިޓިއުޓް އޮފް އެޑިއުކޭޝަންގެ ކުރީގެ ކަރިކިއުލަމް ޑިވެލޮޕަރ) މަރިޔަމް ޝަޒްނާއެެވެ. މި ފޮތްތައް ތައްޔާރުކޮށްފައި ވަނީ ޤައުމީ މަންހަޖަށް ރިޢާޔަތްކޮށްގެންނެވެ.
މި ފޮތްތައް ބޭނުންކުރަން ފެށުމުގެ ކުރިން ކަމާ ބެހޭ އިދާރާތަކުން ނަގަންޖެހޭ ހުއްދަތައް ނެގޭނެއެވެ. އަދި ފޮތްތައް ބޭނުންކުރަން އެދޭ އެންމެހައި ސްކޫލްތަކަށް ފޮތްތައް ލިބޭނޭ މަގު އިލްމު އިންސްޓިޓިއުޓުން ފަހިކޮށްދޭނެއެވެ.
ޤައުމީ މަންހަޖުގައި ހިމެނޭ ފޮތްތަކުގެ އިތުރުން، ޕްރީ ސްކޫލްގެ ހުރިހާ މަރުޙަލާއަކަށް ބޭނުން ކުރެވޭ ގޮތައް " އިސްލާމިކް ވެލިއުސް އެންޑް އެތިކްސް"އަށް ޚާއްޞަ ފޮތެއްވަނީ އެކުލަވައިލައިފައެވެ. މީގެ އިތުން މި މަރުޙަލާތަކަށް ޢަރަބި ބަސް ކިޔަވައިދޭ ފޮތް ސެޓް ވެސް ތައްޔާރު ކުރެވޭނެއެއެވެ.
މި ފޮތްތައް ލޭ އައުޓް ހެދުމާއި ޑިޒައިންކުރުމާއި ޕްރިންޓް ކުރުމާއި ފޮތްތަކާ ގުޅޭ އެހެންކަންކަމަށް ބޮޑު ހޭދައެއް ކުރަންޖެހޭތީވެ، އައިއޯސީސީއާއި އިލްމު އިންސްޓިޓިއުޓުން ވަނީ މިފޮތް ސެޓް ސްޕޮންސަރ ކުރާނެ ފަރާތަކަށް ފުރުޞަތު ހުޅުވައިލާން ނިންމައިފައެވެ. އަދި މިކަމުގައި މާލީ ގޮތުން އެހީތެރިކަންދޭނެ ފަރާތްތަކަށް ވެސް ފުރުޞަތު ހުޅުވައިލެވިފައި ވެއެވެ.
ފޮތްތަކާ ޙަވާލުވުމަށް ބޭއްވި ބައްދަލުވުމުގައި ފޮތްތަކާ ޙަވާލުވީ، އައިއޯސީސީގެ ރައީސް، އަދި އިލްމު އިންސްޓިޓިއުޓްގެ ޑިރެކްޓަރ ޖެނެރަލް ޑރ. މުޙައްމަދު ޝަހީމް ޢަލީ ސަޢީދުއެވެ. ޑރ. ޝަހީމް ވަނީ، ފޮތްތައް ނިންމެވުމަށް މަރިޔަމް ޝަޒްނާ ކޮށްދެއްވި އަގު ހުރި މަސައްކަތްޕުޅަށް ޝުކުރު އަދާކުރައްވައިފައެވެ.
ޝަޒްނާއަކީ ތަޢުލީމީ ދާއިރާގެ ޚިދުމަތްތެރިއެކެވެ. އޭނާ މިހާރު ގެންދަވަނީ މެލޭޝިޔާގެ ޔުނިވަރސިޓީ ސައެންސް އިސްލާމްގައި އެޑިއުކޭޝަން ދާއިރާއިން ޕީއެޗްޑީ ޙާޞިލްކުރައްވަމުންނެވެ.
Ads by STO
