އަހަރު ދެބައި ނުވަނީސް އާސަންދަ ބަޖެޓް އެއްކޮށް ހުސްވެއްޖެ
ދިވެހި ރައްޔިތުންނަށް ބޭސްފަރުވާގެ ޚިދުމަތް ހިލޭ ފޯރުކޮށް ދިނުމަށް އުފައްދައިފައިވާ ގައުމީ ހެލްތު އިންޝުއަރެންސް ސްކީމް (އާސަންދަ)އަށް މިއަހަރަށް ދައުލަތުން ކަނޑައެޅި ބަޖެޓް ހުސްވެއްޖެއެވެ.
ދައުލަތުގެ މިއަހަރުގެ ބަޖެޓްގައި އާސަންދަ ސްކީމަށް ކަނޑައަޅައިފައި ވަނީ 730 މިލިއަން ރުފިޔާއެވެ.
ފިނޭންސް މިނިސްޓްރީގެ ތަފާސްހިސާބުތަކަށް ބަލާއިރު މިމަހުގެ ނުވަވަނަ ދުވަހުގެ ނިޔަލަށް އާސަންދައަށް 795 މިލިއަން ރުފިޔާ ހަރަދުކޮށްފައިވެއެވެ.
މިދިޔަ އަހަރުގެ މިމުއްދަތުގައި އާސަންދަ ސްކީމުން ހަރަދުކޮށްފައިވާ ކަމަށް ތަފާސްހިސާބުތަކުން ދައްކަނީ 658 މިލިއަން ރުފިޔާއެވެ. އާސަންދައަށް ކަނޑައެޅި ބަޖެޓް ހުސްވެފައިވާއިރު، ސަރުކާރުގެ ދަރަނި އިތުރުވެ، ޚަރަދު އިތުރުވަމުންދާތީ ގިނަ ބައެއްގެ ކަންބޮޑުވުން ދަނީ ފާޅު ކުރަމުންނެވެ.
އާސަންދަ ސްކީމަށް ކަނޑައެޅި ބަޖެޓު މިދިޔަ އަހަރުވެސް ނުނިމެނީސް ވަނީ ހުސްވެފައެވެ. މިދިޔަ އަހަރު ނިމުނުއިރު ދައުލަތުގެ ބަޖެޓުން އާސަންދައަށް 1.5 ބިލިއަން ރުފިޔާ ވަނީ ހޭދަކޮށްފައިވެއެވެ.
