ބަހުން ޖެހި ދެ އެކްސިޑެންޓް ހިނގައިފައިވޭ: ފުލުހުން
މިދިޔަ ހޮނިހިރު ދުވަހު މާލޭގައި ބަހުން ޖެހި ދެ އެކްސިޑެންޓެއް ހިނގައިފައިވާ ކަމަށް ފުލުހުންގެ ޚިދުމަތުން ހާމަކޮށްފިއެވެ.
ފުލުހުން މިހެން ވިދާޅުވީ އިއްޔެ ހިނގި ބަސް އެކްސިޑެންޓަކާ ގުޅިގެން މައުލޫމާތު ދިނުމުގައި އޮޅޭ ގޮތަށް މައުލޫމާތު ދީފައިވާ ކަމަށް ދެކެވޭ ވާހަކަތައް ސާފުކޮށް ދެމުންނެވެ.
އިއްޔެ ހިނގި އެކްސިޑެންޓްގައި އަނިޔާވި މީހާއާ ގުޅޭ ގޮތުންނާއި އެކްސިޑެންޓް ހިނގި ވަގުތާ ގުޅޭ ގޮތުން ދޮގު މައުލޫމާތު ފުލުހުންދިން ކަމަށް ބައެއް މީޑިއާތަކުން ރިޕޯޓް ކުރިއެވެ.
މީޑިއާތަކަށް ފުލުހުން ހޮނިހިރު ދުވަހު ވިދާޅުވީ، ބްރިޖް ލައިޓް ކައިރިން އެމްޓީސީސީގެ ބަހަކުން ސައިކަލެއްގައި ޖެހިގެން މެންދުރު ފަހު 3:14 ކަންހައިއިރު އެކްސިޑެންޓެއް ހިނގައިފައިވާ ކަމަށެވެ. އެކްސިޑެންޓްވީއިރު ސައިކަލް ގައި އިނީ 53 އަހަރުގެ އަންހެނެއް ކަމަށާއި އެ މީހާ ވެއްޓި އަނިޔާވެފައިވާ ކަމަށެވެ. ފުލުހުން ވިދާޅުވި، ގޮތުގައި އަންހެން މީހާގެ ފައިން ހަން މަށައިގެން ދިޔައީއެވެ. އިތުރު އަނިޔާއެއް ލިބުނު ކަމަކަށް ވިދާޅެއް ނުވެއެވެ.
މީޑިއާތަކުން ރިޕޯޓް ކުރީ އެ މީހާގެ އަތް ބިންދައިގެން ގޮސް އަނިޔާތަކެއް ލިބުނު ކަމަށެވެ. މިކަމާ ގުޅިގެން، ފުލުހުން ވިދާޅުވީ ހޮނިހިރު ދުވަހު 12:19ހައިއިރު ކުރީގެ ކުނިކޮށި ކައިރީ ބަހަކާއި ސައިކަލެއް ޖެހި އެކްސިޑެންޓެއް ވެފައިވާ ކަމަށެވެ. އެކްސިޑެންޓާ ގުޅިގެން ސައިކަލްގެ ފަހަތުގައި އިން 66 އަހަރުގެ ދިވެހި އަންހެނަކަށް އަނިޔާވެ ޓްރީ ޓޮޕްގައި ފަރުވާ ދެމުން އަންނަ ކަމަށް ވިދާޅުވިއެވެ.
