އިދިކޮޅުން މަޖިލީހަށް ހުށައަޅާ ކަންކަމަކީ ސީރިއަސް މައްސަލަތަކެއްކަން ދަނީ ސާބިތުވަމުން: އާދަމް ޝަރީފް
އިދިކޮޅުން މަޖިލީހަށް ހުށައަޅާ ކަންކަމަކީ ސީރިއަސް މައްސަލަތަކެއްކަން ސާބިތުވަމުން އަންނަކަމަށް ޕީއެންސީގެ ނާއިބު ރައީސް އަދި މަޑުއްވަރީ ދާއިރާގެ މެންބަރު އާދަމް ޝަރީފް ޢުމަރު ވިދާޅުވެއްޖެއެވެ.
އާދަމް ޝަރީފް މިހެން ވިދާޅުވެފައި ވަނީ ދައުލަތުގެ ހިންގުމުގެ ޚަރަދުތަކެއް ކުޑަކުރުމަށް ޓަކައި ޚާއްސަ ފިޔަވަޅުތަކެއް އެޅުމަށް ސަރުކާރުން ނިންމި ޚަބަރު ޓްވީޓް ކުރައްވަމުންނެވެ.
އާދަމް ޝަރީފް ވިދާޅުވީ، ސަރުކާރުން ބޭނުންވާގޮތަށް ރަބަރު ސްޓޭމްޕް ޖަހާ މަޖިލީހަކުން ޤަބޫލު ނުކުރިޔަސް، އިދިކޮޅުން މަޖިލީހަށް ހުށައަޅާ އަދި ދައްކާ ވާހަކަތަކަކީ ސީރިއަސް މައްސަލަތަކެއްކަން ސާބިތުވަމުންދާކަމަށެވެ. ޤައުމު އެއްކޮށް ބަނގުރޫޓުވުމުގެ ކުރިން ފިޔަވަޅުތައް ހަރުދަނާކުރުމަށް ވެސް އާދަމް ޝަރީފް ގޮވައިލެއްވިއެވެ.
"ސަރުކާރުން ބޭނުންވާ ގޮތަށް ރަބަރު ސްޓޭންޕް ޖަހާ މަޖިލިސްއިން ޤަބޫލު ނުކުރިޔަސް، އޮޕޮޒިޝަން (އިދިކޮޅުން) މަޖިލީހަށް ހުށަހަޅާ އަދި ދައްކާ ވާހަކަތަކަކީ ސީރިޔަސް މައްސައްލަތަކެއްކަން މިދަނީ ސާބިތުވަމުން. ޤައުމު އެއްކޮށް ބަގުރޫޓްވުމުގެކުރިން ފިޔަވަޅުތައް ހަރުދަނާކުރޭ" އާދަމް ޝަރީފް ކުރެއްވި ޓްވީޓެއްގައި ވިދާޅުވިއެވެ.
އެމްޑީޕީގެ މެޖޯރިޓީ އޮންނަ މަޖިލީހަށް އިދިކޮޅުން ހުށަހަޅަމުން އަންނަ ގިނަ މައްސަލަތައް ދަނީ ބޭރު ކުރަމުންނެވެ. މިކަމާ ގުޅިގެން އެމްޑީޕީގެ ބައެއް މެންބަރުން ވެސް މީގެ ކުރިން ވަނީ ކަންބޮޑުވުން ފާޅުކޮށްފައެވެ.
Ads by STO
