ހަމަނުޖެހުން ހިންގަން ބައެއް އާލާތް ނެރެފައި ވަނީ ޕީޕީއެމް އޮފީހުން: ފުލުހުން
ޔޯގާ ދުވަހާ ގުޅިގެން މިއަދު ގަލޮޅު ދަނޑުގައި އޮތް އިވެންޓް ހުއްޓުވާ ހިންގި ހަމަނުޖެހުން ހިންގުމަށް ބައެއް އާލާތް ނެރެފައިވަނީ ޕީޕީއެމްގެ އޮފީހުން ކަމަށް ދިވެހި ފުލުުހުންގެ ޚިދުމަތުން ވިދާޅުވެއްޖެއެވެ.
ފުލުހުން މިހެން ވިދާޅުވީ ދެންމެ ނެރުނު ބަޔާނެއްގައެވެ. އެ ބަޔާނުގައި ފާހަގަކޮށްފައި ވަނީ އެއްވުމުގެ ބައިވެރިން ގެންގުޅުނު ދިދައާއި ސައުންޑް ސިސްޓަމްކަމަށް ބެލެވެއެވެ.
އެ ހަމަނުޖެހުން ހިންގި މީހުން ތިބީ ޝަހާދަތުގެ ދެކަލިމަ ، ކަޅު ކުލައިން ލިޔެފައިވާ ހުދު ކުލައިގެ ދިދަތަކެއް ހިފައިގެންނެވެ.
ފުލުުހުން އިތުރަށް ވިދާޅުވީ، މިކަމާ ގުޅިގެން ފުލުހުންގެ ޚިދުމަތުން ރެސްޕޮންސް ކުރިގޮތުގެ އިންޓާނަލް ރިވިއުއެއް ހަދާނެ ކަމަށާއި މައްސަލަ ވަރަށް ސީރިޔަސް މައްސަލައެއްގެ ގޮތުގައި ބަލަމުން އަންނަ ކަމަށެވެ.
މިކަމުގައި ޕީޕީއެމްގެ ބައިވެރިވުމެއް އޮތް ކަމަށް ފުލުހުން ވިދާޅުވި ނަމަވެސް ޕީޕީއެމްއިން އެކަން ދޮގު ކުރެއެވެ.
މީޑިއާއަކާ ވާހަކަފުޅު ދައްކަވަމުން ޕީޕީއެމްގެ ސެކްރެޓަރީ ޖެނެރަލް މުހައްމަދު ތޮލާލް ވިދާޅުވީ އެއްވެސް އިރެއްގައި ހަމަނުޖެހުމަކަށް ޕީޕީއެމްއިން ފުރުސަތު ނުދޭނެ ކަމަށެވެ.
"އަޅުގަނޑުމެން އެއްވެސް ވަރަކަށް ގާނޫނުތަކާއި އުސޫލުތަކުން ބޭރުން އެފަދަ ކަންކަން ހިތްވަރު ނުދެން، އެފަދަ ކަމެއް ކުރުމުގައި އަޅުގަނޑުމެން ބައިވެރި ވެސް ނުވާނަން، އެފަދަ ކަންކަން މި ޕާޓީން ބަލައިނުގަންނާނަން،" ތޮލާލް ވިދާޅުވިއެވެ.
