ޔޯގާ ހެދުމަކީ ހަރާމްކަމެއް ކަމަށް ބުނާހައި ހިނދަކު ސަލާމަތުގެ އައްސޭރިއަކަށް ނުދެވޭނެ: ރައީސް ނަޝީދު

ރާއްޖޭގައި ޔޯގާ ހެދުމަކީ ހަރާމްކަމެއް ކަމަށް ބުނާހައި ހިނދަކު ސަލާމަތުގެ އައްސޭރިއަށް ނުދެވޭނެކަމަށް އެމްޑީޕީގެ ރައީސް އަދި ރައްޔިތުން މަޖިލީހުގެ ރައީސް ވިދާޅުވެއްޖެއެވެ.

Ads by MWSC

އެމްޑީޕީގެ އަހަރީ ދުވަސް ފާހަގަކުރުމަށް މިއަދު ހަވީރު ބޭއްވި ރަސްމިއްޔާތެއްގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ ޔޯގާއަކީ ހަރާމްކަމެއް ކަމަށާއި, ކަސްރަތު ކުރުމަކީ އިސްލާމްދީނާ ހިލާފުކަމެއް ކަމަށް ބުނެ މި ބާވަތުގެ ވާހަކަ ދައްކައި އާންމު ދިރިއުޅުމަށް ބުރޫ އަރުވާން ފަށައިފި ނަމަ ދިވެހިންނަށް ސަލާމަތުގެ އައްސޭރިއަކަށް ނުދެވޭނެ ކަމަށެވެ.

ނަޝީދު ވިދާޅުވީ ގައުމުތައް ބާކީވެގެން ދިޔަ ތަނާއި ގައުމުތައް ހަލާކުވެގެން ދިޔަ މަންޒަރު ވެސް ފެނިއްޖެ ކަމަށާއި ރާއްޖެ އެ ހާލަތަށް ދިއުމަށް ޖާގަ ދެވިގެން ނުވާނެ ކަމަށެވެ.

''ރާއްޖޭގެ ރައްޔިތުން އެދޭ ރާއްޖެއެއް ހޯދައި ދިނުމަކީ މި ދިވެހި ރައްޔިތުންގެ ޑިމޮކްރެޓިކް ޕާޓީގެ އަބަދުވެސް އަމާޒު. ކުރިއަށް އޮތް ތަނުގައި ވެސް އެ މަގުސަދު ހާސިލުކޮށްދޭނެ ޕާޓީއަކީ އެއްވެސް ޝައްކެއް ނެތް ގޮތުގައި މި ދިވެހި ރައްޔިތުންގެ ޑިމޮކްރެޓިކް ޕާޓީ.'' ކުރީގެ ރައީސް ނަޝީދު ވިދާޅުވިއެވެ.

ރައީސް ނަޝީދު މިހެން ވިދާޅުވެފައި ވަނީ މިމަހުގެ 21ވަނަ ދުވަހު ބައިނަލްއަޤްވާމީ ޔޯގާ ދުވަސް ފާހަގަ ކުރުމަށް ބޭއްވި ހަރަކާތަށް ބަޔަކު ހުރަސް އަޅައި މާރާމާރީ ހިންގައިފައިވާ ދަނޑިވަޅެއްގައެވެ.

މީގެ އިތުރުން އިސްލާމިކް މިނިސްޓްރީގެ ސީނިއާ އެގްޒެކްޓިވް ޑިރެކްޓަރު ހިޝާމް އަހުމަދު ސޮއިކޮށް، ކޮމިޝަނަރު އޮފް ޕޮލިސް މުހައްމަދު ހަމީދަށް، ޔޯގާއާ މެދު އިސްލާމީ ބޮޑެތި އިލްމުވެެރިންނާއި ގައުމުތަކުގެ ފަތުވާ މަޖިލީސްތަކުގެ ނިންމުން ބަޔާންކޮށް، ޔޯގާ ހެދުމަކީ އިސްލާމީ ޝަރީއަތާ ޚިލާފު ކަމެއް ކަމަށް ބުނާ ސިޓީއެއް މިއަދު ވަނީ ފެންމަތިވެފައެވެ.